Boxing-ah medal 16 a chiang

NE Olympic Games khelh mekah, Mizote ngainat leh ngaihsan boxing-ah Mizoram-in a tlem berah medal 16 an hlawh dawn - Mizoram aṭangin boxer 17-in inelna an hmachhawn a, boxer zinga 14-in fight hmachhawnin boxer 13-in hnehna an chang a, boxer dang pathum erawh an bye thung.

Mizo boxer paruk chuan Zirtawpni khan fight hmasa ber hmachhawnin hnehna an chang vek a, Inrinni khan Mizo boxer dang pariatin inelna hmachhawn ve lehin pasarih an chak a, pakhat erawh a vanduai ta a ni - boxer-te hian semifinal an lut nghal vek a, semifinal-ah hian chak lo ta vek pawh ni se bronze medal chu an dawng ṭheuh hrim hrim dawn a, boxing aṭang ringawtin Mizoram-in medal 16 a hawn dawn tihna a ni.

Inrinni khan Mizo boxer inlan zingah Freddy Lalchhantluanga (46-48kg), Lalruatfela (51-54), Lalnunzira (60-63.5), Zochhuanawma Fanai (61-71kg) leh Malsawmkima (71-75kg) ten mipa lamah harsatna liantham tawk loin an khingpui an hneh vek a, hmeichhe lamah Lalrinchhani Pautu (45-48kg) leh Lalremsiami (48-50kg) ten hnehna changin Ruthi Lalhmingṭhai (52-54kg) erawh a chak zo ta lo.

Mawroh Community Hall-a inhnekah Ruthi hian round khatna thunun mah se, round hnihnaah a talbuai a, round thumnaah rawn insiamṭha lehin, hnehna a chang zuiah inngai mah se judge lamin Manipur boxer TH Ojibala Devi chu chak zawkah an puang - Ruthi-i'n mittui nen dressing room lam a pan.

Mizoram coach Rozamliana chuan, "Pakhatah kan vanduai a, a bak zawngah kan chak thung. Bronze medal-ah lungawi kan tum lo a, boxer 16 hian final an luh leh vek kan beisei - final-ah kan inhmu leh dawn nia," tiin Vanglaini a hrilh a, a naute chungah rinna a nghat.

Mizo boxer-te hian vawiin chawhma dar 11:00 aṭangin semifinal hi an khel ṭan lehnghal dawn a, boxer 16-te hian vawiinah an dinhmun tur an hre nghal vek dawn - final luh ngei tumin Mizo boxer-te an inlan ang.