Table tennis - Mizo nula leh tlangval an thiam ber
Hmarchhakah Mizoram aia table tennis thiam zawk an awm lo - Zirtawpni zan khan North East Olympic Games, table tennis-a team inelnaah Mizoram mipa leh hmeichhe team an champion a, Shillong khawpuia 'kei ka ni' tia fuankhawm zingah anni aia thiam an tawng lo.
Indoor Hall, NEHU, Shillong-a Women's final hmuhnawm takah Mizoram leh infiamna khawvela Mizoram hmelma kumhlun Manipur an intawng a, Mizo nula Lalthansangi Sailo, Malsawmtluangi leh Lalmuanawmi ten an khingpui hneh ṭheuhin, Mizoram hian harsatna nei loin, final-ah 3-0 in hnehna an chang a ni.
Mizo nulaten Manipur nulate an tlawm hnu lawkah Men's team final khelh chhunzawm ve leh nghal a ni, Mizo infiammite an hlauthawng hman - Mizoram hi 2-0 in an hniam hman a, mahse, a tawp berah John Zamliana inlarin, tlangval hian hnehna a rawn chang a, reverse singles khelh a ngai zui.
Mizoram innghahna leh table tennis infiamna hriat hlawh tling phak Alberto LR Ruata chuan innghahna tlak a la ni reng tih pholang ve lehin, hnehna a chang a, inelna boruak sang karah Lalrosanga'n zam hmel pu loa hnehna chang zui ve lehin, Mizoram hi 3-0 in an chak daih - Manipur tan chuan a na vawng vawng ang.
Mizoram table tennis team hian singles leh doubles inelna an hmachhawn bawk a, he thu buatsaih a nih lai hian an thlen chin chiang taka sawi theih a la ni lo.
Mizoram coach Lalngainatawma chuan, "Team champion nih hi kan tum dan leh kan inbeisei dan a ni a, gold aia hniam kan mitthla lo - tun dinhmun kan thleng thei hi kan lawm hle," tiin Vanglaini a hrilh a, singles leh doubles-ah beisei an neih san thu a sawi bawk.
Women's doubles-ah Lalthansangi Sailo & Malsawmtluangi leh Men's doubles-ah Alberto LR Ruata & John Zamliana ten nimin khan final an lut bawk a, vawiinah final an khel ang. Mixed doubles-ah Alberto LR Ruata & Thansangi Sailo leh John Zamliana & Malsawmtluangi te ṭangdunin semifinal an lut ve ve a, nizan khan anni hi an intawng a, result kan hre hman lo.
Women's singles-ah Lalthansangi Sailo chuan semifinal a lut a, vawiinah a khel dawn a, Men's Singles-ah Alberto LR Ruata, John Zamliana leh Lalruatsanga ten quarterfinal lut vekin, nizan khan an inlan a, result kan hre hman lo.