I League-ah Gokulam an chak nghal

Gokulam Kerala chuan I League match hmasa berah Mohammedan SC chu 1-0 in an hneh. Inrinni khan I League match hmasa ber hi Manjeri Payyanad Stadium, Kerala-ah khelh ṭan a ni.

Kerala club Gokulam hi champion lai an ni a, Mohammedan nen hian season tawp match hnuhnung berah champion tur an zawng. Tun season match hmasa berah an inkhel ang a, Malabarians hian minute 57-naa forward thar Auguste Somlaga goal hmangin hnehna an chang.

Mohammedan tan hian defender Vanlalzuidika Chhakchhuak leh keeper Zothanmawia ten bul an ṭan a, bench-ah Sairuatkima a awm bawk. I League hawnnah hian AIFF president Kalyan Chaubey, secretary Dr. Shaji Prabhakaran leh League Committee chairman Lalnghinglova Hmar ten a hmunah an en a ni.

Vawiin tlai dar 4:30 hian Sudeva Delhi leh Kenre te an inkhel ang a, zanin dar 7:00-ah RoundGlass Punjab leh Sreenidi Deccan te an inkhel bawk ang. Mizo club Aizawl FC chuan November 15,Thawhlehni tlai dar 4:30 hian RG Stadium, Mualpuiah Trau an hmachhawn ang.

Tun season I League champion hian season tharah Indian Super League an khel dawn. Team 12 - Aizawl FC, Churchill Brothers, Gokulam Kerala, Mumbai Kenkre, Mohammedan, Neroca, RoundGlass Punjab, Rajasthan United leh Real Kashmir, Sreenidi Deccan, Sudeva Delhi leh Trau te an inel ang.

November 12, Inrinni
Gokulam Kerala 1 - 0 Mohammedan SC
GOK : Auguste Somlaga 58'
Nimin Inkhel (Result kan hre hman lo)
Neroca 4:30 PM Real Kashmir
November 14, Thawhṭanni
Sudeva Delhi 4:30 PM Kenre
RoundGlass Punjab 7:00 PM Sreenidi Deccan
November 15,Thawhlehni
Aizawl FC 4:30 PM Trau
Churchill Brothers 7:00 PM Rajasthan FC