Chelsea ngamtu Magpies

Newcastle United an che fuh laklawh a, chutih laiin Chelsea an che fuh lo laklawh ve thung. Inrinni zan Premier League inkhelah Magpies hian Joe Willock-a goal mawi hmangin Blues hi 1-0 in an hneh.

Tun hnaia khel ṭha tak Miguel Almiron-a ball lakluh chu laklawh nei miah loin Willock-a'n a pet lut a, point thum hmuh nan a tawk. Newcastle hi kum 2001 hnu lama a vawi khat nan Krismas laiin a sang zual pali zingah an tel.

Pierre-Emerick Aubameyang leh Raheem Sterling tel loa khel Chelsea goal nawr a na lo. Christian Pulisic leh Kai Havertz an luh hnuah hlauhawm hret mah se, tlarhnung phui vanga fak hlawh Eddie Howe-a naute an paltlang zo lo.

Newcastle manager Howe chuan, "Tuna kan dinhmunah hian kan lawm lo a nih chuan dawt kan sawi a ni ang. Mahse, hetah hian kan tawp dawn tihna a la ni lo, season chanve pawh kan la hmang zo lo a, league a la hautak dawn chauh," tiin a sawi.

Chak lo Chelsea hian league match 14 aṭangin point 21 an nei a, pariatna dinhmun an luah mek. Palina Tottenham an phak lohna chu point sarih lai a ni a, tunlai an khelh dan thlir chuan season thara Champions League khelh phak a harsa ang.