FC Venghnuai = Chawnpui FC

Honda MPL9-ah FC Venghnuai leh Chawnpui FC te November 11, Zirtawpni zan khan 1-1 in an inhnehtawk. RG Stadium-a inkhel team pahnih hi semifinal khelh tuma inum mek an ni a, chak zawk an awm loh avangin table a danglam lo - semifinal inchuh boruak erawh a hot zel.

FC Venghnuai hian Malsawmzuala Tlangte hmangin minute 25-naah an khung hmasa a, season hmang ṭha MC Malsawmzuala hmangin Chawnpuiin minute 36-naah an sut. Chawnpui hi chak se Venghnuai chunga an awm theih avangin hun tawp thlegin boruak a ṭang.

MPL9-ah Aizawl FC-in semifinal an lut chiang tawh a, club pali Venghnuai (19), Mizoram Police (19), Chhinga Veng (18) leh Chawnpui (17) ten hmunruak pathum an inchuh - knockout stage lut tur hriatthiam a la har hle.

Venghnuai hian Electric Veng leh Chhinga Veng te an la hmachhawn dawn a, Chawnpui hian Chanmari leh Mizoram Police te an hmachhawn dawn. Tun dinhmunah Lalsangzuala Hmar hote hi point la hmu hniam ber mah se an dinhmun a ṭha. An khingpui tur Chanmari hi an chefuh hleithei lo a, Police hi team ṭha ni mah se Sikkim-ah invitation tournament an hmachhawn dawn avangin 'Police Reserve Team' an hmachhawn turah a ngaih theih.