En man a awm lo : AFC-in mipui thlawpna an ngen

Inrinni khan I League inelna ṭan a ni a, Aizawl FC-in vawiin aṭangin an khel ṭan dawn. Mizo club hian vawiin tlai dar 4:30 hian RG Stadium, Mualpuiah Trau an hmachhawn ang.

AFC hian Mizo mipui thlawpna an ngen a, I League match hmasa berah ticket a awm dawn lo.Aizawl FC coach Standly Rosario chuan, "I League khel turin kan inpeih. MPL-ah result ṭha tak nei a, hmahruaitu kan nih mek avangin inrintawkna kan ngah hle. Trau lakah pawh hian chak ngei kan tum a, chak turah kan inngai bawk.

Hnehna kan chan theih nan kan player-ten au phurtu an mamawh a, mipui thlawpna kan mamawh," tiin Vanglaini kaltlangin inkhel en turin mipui a sawm.

Inelna ṭha zawk
I League season tharah Indian Arrows paih an ni a, 'point box' tiha sawi theih team an awm tawh lo. Inelna hmachhawn tur team 12-ten foreigner an nei vek dawn tihna a ni a, point hmuh awlsamna bik a awm tawh lo ang.

Inelna ṭan hmain AIFF-in thuchhuah an siam a, I League champion-in season tharah Indian Super League an khel dawn. Hei hian I League-ah boruak a ṭha thlen ang. Aizawl FC coach Standly chuan, "Season thara I League champion-in ISL an khel nghal tur hi chanchin ṭha a ni a, team zawng zawngah phurna a pe ang. Keini pawh kan phur a, champion thei turin kan squad pawh a ṭha," tiin Vanglaini a hrilh.

Champion tum AFC
Aizawl FC-in season ṭantirhah technical director atan Hmingthansanga an laklet thu an puang a, Khatla pachal Hmingthana hi I League an champion ṭuma technical director kha a ni a, India football hrechiangtu a ni.

Mizo club hian Hmingthana tel loin I League season hnih an khel a, 2019–20 season-ah phei chuan an talbuai hle. Player registration tih fel hman loh avangin season ṭantirh lamah foreigner leh Mizo player ṭhenkhat an chhawr thei lo a, January thla transfer inhawn laiin an ziaklut thei chauh.

Tun season-ah erawh Aizawl FC an che hma a, tualchhung player ṭha an chuh chak bakah I League hman tur foreigner an la fel tawh bawk. Mizo club player lak zinga hming langsar ber chu Henry Kisekka a ni a, Ugandan forward hi Gokulam Kerala, Mohun Bagan leh Mohammedan-ah hming a chher tawh.

Aizawl FC hian foreigner panga leh state pawn player pakhat an la a, an player lak dan thlirn tlarhnung an ngai pawimawh tih a lang. Centre back-a ding turin Nigerian defender Emmanuel Makinde leh Japanese defender Akito Saito te an nei a, MPL-a che ṭha captain Lalchhawnkima, L a l m u a n a w m a ( M u n e z ) leh Rohmingthanga te an la kawl bawk.

AFC hian Japanese defender bakah hian Japanese defender midfielder Eisuke Mohri an la kawl a, state pawn player Maharashtra aṭanga an lak Vikram Lahkbir Singh hi goalkeeper a ni.

Midfield-ah season hmasa lama an neih tawh Matias Veron an lalet a, training aṭanga thlirin Argentine midfi elder hian Mizo club a khelh hmasak aiin hma a sawn tawh zawk.

Engtin zel?
Aizawl FC hian season liam ta khan Trau hi ṭum hnih ngawt an hneh lo a, Mizo club tan Manipur club hi zuam ngawt a rem lo. Standly Rozario hote hian MPL-ah result ṭha tak an nei a, table hmahruaitu an nih avangin inrintawkna an nei dawn.

Amaherawhchu tun season MPLah foreinger an inlan loh avangin Mizo player leh foreigner-te hi khelmual chhungah an inhrechiang tawh em tih hriat a la ni lo. Vawiin hian Trau lakah fiahna an hmachhawn dawn.

Manipur club hi L. Nandakumar Singh-in a enkawl a ni a, ani hi I League kaipuitu coach kha niin club hrechiangtu a ni. Trau hian foreigner an nei ṭha - Brazil junior tan pawha khel tawh centre back Gérson Vieira bakah Ghanaian player pahnih Godfred Yeboah leh Nana Poku, Tajikistan international striker Komron Tursunov te an nei. Vawiin inkhel turah Mizo club an chak chiang sa lo - chak turin mipui thlawpna an mamawh.