Shooting-ah Mizoin medal paruk la
NE Olympic Games neih mekah, shooting-ah Mizoramin medal paruk an la a, mahse gold lak erawh an nei lo. Nimin khan shooting inelna hi neih a ni a, Mizoram hian bronze pali lain, silver pahnih an la bawk.
Assam Regimental Centre, Happy Valley-a neih inelnaah hian, 25 mtr Standard Pistol, team inelnaah Mizoram tan Lalhmangaihtluanga, PC Lalrinfela leh Lalramthara ten silver an hlawh chhuak a, anni hian 10 mtr Air Pistol Men's team-ah bronze an hlawh bawk - Tlangnuam tlangval Lalhmangaihtluanga hian 25 mtr Standard Pistol Individual-ah bronze a kap chhuak a, medal pathum a hawn tihna a ni.
50 mtr Small Bore Rifle Prone Women's team inelnaah Mizoram tan Vanlalhruaii Ralte, Lalhlimpuii leh Lallawmzuali Zadeng te chuan silver medal an hlawh bawk. 50 mtr Small Bore Rifl e Prone inelnaah vek mipa team tan Erast, Fabian Lalrinliana leh David Vanlalhruaia ten bronze an hlawh bawk.
10 mtr Air Rifle Men's team inelnaah Erast Lalhruaimawia, Fabian Lalrinliana leh Eric Vanlalhriatsanga ten bronze an hlawh bawk a, Mizoram team hian shooting inelna chu an hmachhawn zo nghal a ni.