Club-in min phatsan - Ronaldo

Manchester United forward Cristiano Ronaldo chuan club-in a phatsana a ngaih thu a sawi a, manager Erik ten Hag zahna a neih loh thu a sawi bawk. Kum 37 mi Ronaldo hi TalkTV tana Piers Morgan-a'n a kawm ṭumin a rilru chhungril tak tak a sawi chhuak a, a ṭawng nat em avangin Old Trafford-a hmalam hun hriatthiam a har hle.

Ronaldo chuan, "Mipui hian thudik hi an hre tur a ni. Min phatsan a, ka awm loh hi an duhzawkin ka hria. Kumin chauh ni loin kum hmasa lam khan a ni tawh. Coach bakah club chhunga mi pahnih emaw pathum emawin ka awm loh hi an duh a ni," tiin a sawi.

Portugal Captain Ronaldo hi United-in Aston Villa 3-1 a an hneh loh ṭumin captain a, hemi hnu hian damlohna (a chhan an sawi lo) vangin a khel leh tawh lo. Thla liam ta khan Ronaldo hi Tottenham an hmachhawn ṭumin bench aṭangin a lut duh lo a, Chelsea nen an inkhelh ṭumin squad-ah an dah lo.

Ronaldo chuan, "Ka chungah zahna a lantir lo a, keipawhin zahna ka nei lo. Min zah lotu chu ka zahna chhan tur ka hre lo," tiin Ten Hag chungchang a sawi. Portuguese forward hian Sir Alex Ferguson-a'n Manchester City zawm lo tura tih avanga Old Traff ord-a let a nih thu a sawi a, Ole Gunnar Solskjaer thlaktu Ralf Rangnick pawh a hriat ngai loh thu a sawi.

Man United forward Ronaldo hian amah sawiseltu chu sawisel let zel a, chung zingah chuan Wayne Rooney pawh a tel. Ronaldo chuan, "Engvangin nge min sawisel chiam ka hre lo. A football career a zawh tawh vang a nih ka ring. Kei erawh chuan ṭha ṭha takin ka la khel.

Thudik ni tho mah se ka hmel ṭhat zawnga vanga min sawisel chu a nih ka ring lo," tiin a khelhpui ṭhin Rooney chungchang a sawi. Ronaldo hian Man United erawh a sawisel phal lo a, a hmangaih thu a sawi thung.