MPL9 khelh hmabak a hmuhnawm dawn

MPL Board-in Zote Honda MPL9 khelh hmabak round hnih chu November 13, Pathianni zan khan an ti chhuak a, tunkarah MPL league round khelh zawh a ni dawn. November 13, Nilainiah round 13 match li khelh zawh vek a ni ang a, November 19, Inrinniah round 14 khelh zawh a ni leh ang.

Tlak hlau
Chanmari FC chu table mawngphahah an awm mek a, match 12 aṭangin point 12 an hmu. MPL-a inham tang turin vawi hnih champion tawh Chanmarians hian match hnih khelh hmabakah hian point an hmuh belh a ṭul a, an chung chiaha awm FC Bethlehem nen an inthlauhna hi point khat chauh a ni.

MPL kaithar Bethlehem hian Mizoram Police an hmachhawn dawn a, Police hi an kim dawn lo. Lalbiaksanga Colney hote hian Sikkim-ah Invitation Tournament an khel dawn a, FCB hmachhawn tur hi Police reserve team tihin a sawi thei ang.

Hemi a nih avang hian Bethlehem tan inhamtanna remchang a awm a, amaherawhchu Police reserve hi zuam ngawt a rem lo. Victor Lalbiakmawia hote hian Police hi hneh ta reng pawh ni se Chanmari FC-in an khingpui Chawnpui FC an hneh chuan an inthlauhna hi point khat a la ni dawn.

Round tawp berah Chanmari leh Bethlehem te hi an inkhel leh dawn a, hetah hian relegate tur chinfel a ni ang. Electric Veng erawh point 12 an hmu tawh a, an hnuaia team pahnih hi an la inkhelh dawn bawk avangin table mawngphahah an awm thei tawh lo.

Boruak a 'hot'
A tawpah chuan relegation battle' aiin champion inchuh a hmuhnawm ṭhin a, tun ṭumah hian semifi nal luh inchuh boruak a sang hle. Aizawl FC-in point 29 an hmu tawh a, an tling chiang tawh. FC Venghnuai, Mizoram Police, Chhinga Veng leh Chawnpui FC ten hmunruak pathum an inchuh dawn.

Fixtures kalhmang hi a fuh em em bawk. Round 14-naah FC Venghnuai leh Chhinga Veng te an inkhel dawn a, Chawnpui leh Mizoram Police te an inkhel bawk dawn. Round tawp bera inkhel tur pali zinga pathum hi a pawimawh dawn tihna a ni.

Chutihrualin round 14 hmuhnawm theih nan round 13 a pawimawh. Nilainiah hian Police, Venghnuai leh Chhinga Veng ten hnehna an chan a, Chawnpui an chak loh chuan round tawp ber khelh hmain semifi nal khel tur a chiang ang.