A vawi khat nan George Russell pakhatna

Pathianni khan Formula 1 inelna neih a ni a, São Paulo Grand Prix-ah George Russell hun a thleng a, British driver hi a career-a a vawi khat nan pakhatna a ni. Tun season F1-ah Red Bull driver Max Verstappen a che ṭha a, a champion chiang tawh. Chutihrualin Brazil-a inelna neihah erawh Verstappen hi podium-ah a lawn pha lo.

Kum 24 mi Russell hian F1-ah kum 2019 aṭang khan bul a ṭan a, Williamsah season hmasa ber a hmang a, season khatnaah hian point hmu lo awmchhun a ni. Tun season-ah Russell hian Mercedes a zawm a, Valtteri Bottas thlakin vawi sarih champion tawh Lewis Hamilton nen an inkawp a, chanchin duhawm a nei ta.

Sao Paulo Grand Prix-ah hian Russellhi a vannei a, Verstappen leh Hamilton te hun ṭantirh lamah an insut avangin a hna a awlsam phah. Verstappen hi hrem a nih avangin podium-ah a lawn pha lo a, Hamilton erawh pahnihna a ni pha thung.

Russellchuan, "Bul kan ṭan ṭhat avangin ka lawm em em a, hnehna ka chang dawn tih ka hriat kha chuang ka biangah mittui a luang tawh. Tun ang hun hi vawi tam tak ka lo mitthla tawh a, motorsport luhchilh te duhthusam hu chu ka tawng ve ta," tiin a sawi.

November 20 hian Abu Dhabi Grand Prix an tlan leh ang a, hemi zawh hian kumin Formula 1 chu a zo ang.