BALL VAR CRICKET KHAWVEL AWPTU: ENGLAND
Kolkata April 16, 2016: Eden Gardens khelmualah ICC T20 World Cup final khelh a ni a, West Indies-in over hnuhnung berah chak nan run 19 an la mamawh. Dinhmun ṭha zawka dinga ngaih England tana over hnuhnung ber vawm tur chu Ben Stokes a ni.
Minute thum chhunga thil thlengin khawvel a barakhaih a, Windies batter Carlos Brathwaitea'n Stokes a ball vawm hmasa pali chu a zawnin mipui ṭhutna lamah a thlawh chhuh sak vek. Khelmual kil khata tuma hnem theih loh Ben Stokes a ṭap hmel chu infi amna khawvel 'headlines' a ni.
Melbourne, November 13, 2022: Kum ruk liam taa hun hrehawm tak tawngtu Ben Stokesan half century siamin, England champion-na run a vaw chhuak a, lawm avanga muttui a luang ve ta thung.
Hringnun hi a mak tiraw? Infiamna Khawvel hi chu a ropui mak danglam i ti ve ṭhin em?Ni e, he Ben Stokes ngei hi alawm kum thum liam ta, July 19, 2019 tlaia, Lords khelmual ngei mai a, a ṭum khatna atan England World champion nih puitu kha.
Ti hi chuan, England Cricket chu chuhbuaitu awm loin ball var cricket-a khawvel awmptu an ni ta. Leilung siamtirh ata, a ruala ICC World Cup leh ICC T20 World Cup nomawi kawl kawp thei awmchhun an ni.
Over to Melbourne
Ruahin a tihbuai theih World Cup final a ni a. Ṭhumvawr a pawimawh leh pek. Mit pawh khap loin England skipper Jose Buttlera'n vawm hmasak a thlang nghal.
Over khatna a zawh meuh chuan he MCG pitch hi run 170/180 vel siam tum aiin, 150 runs bawr vel hi total ṭha tak a ni tih a hriat theih nghal. Ball ṭhenkhat bat-ah a kal zat zat lo tih a hriat nghal. Tin, kan hriat reng tur chu, Melbourne Cricket khelmual hi khawvela khelmual mipui lenna zau ber a nih bakah, a tualzawl pawh zau ber a ni.Square boundary phei chu meter 85 vela thui a ni. Khelmual tam zawka six leh four hi MCG ah chuan a laklawh vela tawp a ni chawk.
Technical & Tactical
English bowler-te team work leh game plan mumal a hmuhnawm. Australia pitch ho hi spinner te vawm kawi zawk zawkna hmun ni ngai lo mah se, tun World Cup a thawm reh tak, wrist spinner Adil Rashid chu final-ah a che ṭha tlat.
Rashid hian a teammate fast bowler-te spell uluk taka lo thlirin, a vawm hnuin ball a sawt muang hret tih chu a hai lo a, test match kan thlir ta emaw tih mai turin ball a fl ight ngam a, spin khel thiam Pakistan batsman ho a chhaihbuai khan a khaikhawm mai awm e. Tin, flight ngam turin a khelmual zawl a lo zau ve kher bawk nen. Zep thu a awm lo - Pakistan lam khan run 20-25 vel chuan target an siam tlem deuh a ni.
Pathan hnam huaisen
Run an siam tlem a, World Champion a ni ngai dawn anih chuan, wicket an lak a ngai tih hre rengin Pakistan bowler vawm kawh ho an rawn pen chhuak.
Darkar khata km 140 chuanga kawh leh mar zet zawtin, England batsman ho drive tur eih pelovin, an awm bawr velah Afridi leh a hoten an han vawm ve ta tak tak. English top order lei rem rap mumal hman a awm meuh lo a ni ber. Shaheen Afridi a inkhel laklawh laia inhliam an tuar kan ti lo thei lo a, part time spinner Iftikhar Ahmed a vawm tir a ngaih phah a, helai tak hi tawnhriat ngah Ben Stokes leh Moeen Ali-a ten remchanna lo lain, Iftikhar a ball nga lek vawm chhunga 13 runs an vuakchhuah sak kha 'Final Turning Point' pakhat kan ti lo thei lo ang.
Inkhawmpui kan ṭiak leh ta
Leilung danin hringnun hi chua a kual a kual a, kum ruk liam ta Kolkata khawpuia zahna kawna luaithlinul Ben Stokes a ngei chu, England fan-ten Hosanna tiin an chawimawi leh ta a. A vawi khatna atan England kaihruaitu Jose Buttler leh a hote chu khawih phak loh khawpa tlang sang ber chhipah an invawrhkai. Baby face Sam Curran-a'n a baby lohzia khawvel hmuah a pholang chiang hle bawk awm e.
Mipui nuai khat chuang khah vekna MCG-ah chuan, English fans hoin 'Sweet Caroline' leh 'Hey Jude' an sa rual ṭhup ṭhup.Khelmual kil khatah chuan England white ball cricket coach, Australian pachal, Matthew Mott-a chuan, "Tunhnaia ka team telna ka champion pui te hi an sial vek a, khaikhin theih an ni lo, mahse, zanin chu ka naute ho nen hian nuam kan ti em em dawn tih erawh ka hria," tia a ṭawngkam hmang hian, England Cricket Team kan lawmpui ve ang e.
Kum 49 mi Mott hian kum li chhungin World Cup champion ṭum hnih a ni hman. Kum 2020 khan Australia hmeichhe team chu T20 World Cup-ah a champion pui a, June thla thleng khan Australia hmeichhe team hi a la enkawl. England champion puitu coach a ni leh bawk. Cricket khawmpui a lo ṭiak leh ta. Tunkar tawp aṭanga ṭan tur, football khawmpui lian FIFA World Cup, Qatar lama neih turah hian, Gareth Southgate leh a hote hian,English mipuite hi 'Hey Jude' leh 'Sweet Caroline' saktir ve thei tak maw?
K Vanlalruata