Mangṭha Dinthar, Chanmari West an kal zel

Mizo club hlun Dinthar FC-in Mizoram Premier League khelh zel duhin Ningani zanah Chanmari FC 3-2 in an lehthal a. Maimawms hnehna hi ropui mah se nimin tlaiah Bethlehem Vengthlang FC leh Chanmari West te 1-1 a an inhnehtawk avangin MPL champion hmasa ber hi Mizoram football league sang ber aṭangin an tla.

West Warrior hian MPL khel zel turin relegation playoff an hmachhawn leh dawn a, BVT erawh an chak zawh loh avangin parukna niin season an khar thung ang.

Zan chhinchhiahtlak
Dinthar FC him turin point thum tal an hmuh a ṭul. Vanlal­rova hote hian Chanmari FC an hmachhawn a, Maimawms tana harsatna belhchhah turin darkar chanve chhung lekin Siaha tlangval MC Malsawmzuala leh Hnahthial rawlthar Jakob Vanlalhlimpuia ten MPL cham­pion lai tan an khung a, Dinthar tan thawhchhuah ngaihna awm tawh loa ngaih a ni.

Maimawms beiseina siam turin captain Samuel Laltlan­thanga'n minute 37-naah a pet goal a, goal khungtu hi Dinthar fapa Samuel-a a nih avangin team boruak a ṭha a, mipui an phur phah bawk. First half tawp hmain Nigerian forward Jackson Victor-a'n Dinthar siphurh a sut a, 'Victor'-a hian Maimawms chakna goal minute 75-naah a khung leh bawk.

Semifinal lut tawh Chanmari FC-in yellow card pali zet an hmu a, Dinthar lamin yellow card panga an chawi bawk. Inkhel boruak sangah Dinthar keeper RS Lallawmzuala a khel ṭha a, Republic Veng rawlthar Lawma hian Chanmari goal khung tur ṭum li vel zet a dang a, Dinthar lawmna siamtu a ni.

Beiseina beidawng
Dinthar coach Vanlalrova'n hun tawp ham rik zawha an chak a lawm dan te, Lammuala Dinthar veng mi dik tak hlim hmel te chu Maimawms-in beiseina thar an nei tih hriat theihna a ni. Amah­erawhchu, MPL champion hmasa ber hi an la him lo a, Bethle­hem Vengthlang kutah an la innghat.

Nimin tlai inkhelah BVT tan Lalnuntluanga'n first half tawp hma chiahin goal an khung a, he goal hi Dinthar FC beiseina chhem alhtu a ni bawk. Amaherawhchu West Warrior lamin MPL khelh zel an duh a, coach H. Lalnunzira'n halftime-ah team fuih ṭhain Van­lalduatsanga penalty hmuh chu captain H. Lal­hlimpuia'n minute 64-naah goal-ah chantir a, 1-1 inkhel a tawp.

Dinthar FC lawmna chu darkar 10 pawh tling loah lung­ngaih­nain a hliah khuh a, Maimawms chuan MPL ṭantirh aṭanga an awmpui FC Kulikawn leh Luangmual FC hnung zuiin an relegate a, Mizoram Police angin an tho leh ang em tih chu hunin a la hril ang.

MPL Playoff leh Qualifier
Mizoram Premier League Season 7 khel thei tur zawnna Playoff leh Qualifier chu December chawlhkar hmasa ber hian Aizawlah khelh a ni dawn. MPL Qualifier-ah hian District Football Association tin aṭangin club pahnih aia tam lo an tel thei a; nimahsela MPL khel tura tehna an zawm a ngai ang. - Secretary, MPL Board