Nadal-a'n thiam a chang

Damdawi hman phal loh a hmang ru tia puh a nih vangin Rafael Nadal-a'n Paris Court-ah intihhmingchhiatna case a thehlut a, a thubuai hi ngaihtuah a nih hnuah thiam chantir a ni.

Nikum March thla khan French health and sports minister hlui Roselyne Bachelot-i chuan TV hmaah Nadal hian dan a bawhchhe ngei nia a hriat thu a sawi a, Spanish tlangval Nadal hian mipui hmaah dan a bawhchhiat loh thu a sawi bakah a dikna lanchhuah theih nan thubuai a thehlut bawk.

Ningani khan Paris Court chuan an thubuai chungchanga an thutlukna hi a ti chhuak a, vangtlang hmaah Nadal a tih hmingchhiat vangin Roselyne Bachelot hi pawisa chawitir a ni.

Kum 2007-2010 chhunga French health and sports minister ni ṭhin Roselyne Bachelot hian kum 2012 kum tawp lama Nadal-a'n match a khelh loh chhan kha a khup hliam vang ni loin dan a bawhchhiatna man chhuah a hlauh vang tiin a puh a ni.

Nadal-a dan hremi Patrick Maisonneuve chuan he thil hian a player hma hun a tih chhiat theih thu leh sumdawnna lam thlenga khawih thei a nih avangin an ngaih thutak thu a lo sawi tawh. Nadal hian world numebr 1 ni chungin season a khar dawn a, a khup hliam vangin tuna khelh lai ATP Finals aṭangin a inhnukdawk tawh.