Zaninah Madrid Derby a awm dawn
Atletico Madrid khelmual thar Wanda Metropolitano chuan a vawi khat nan Madrid Derby a thleng dawn a, zanin dar 1:15-ah Atletico hian an hmelma kumhlun Real Madrid an mikhual ang - an khelmual thara Real lenluh hmasak berah tlawm nghal an duh dawn lo.
Zanin inkhel hmuhnawmna belh-chhahtu tur chu team pahnihin beisei anga season bul an ṭan lo ve ve hi a ni - vawi 11 khelh tawhah point 23 ve ve hmuin pathumna leh palina dinhmun an luah mek a, zanina hnehna chang tan point thum hmuhna a ni mai lo a, elpui ber point thum chhuhsakna a ni nghal bawk.
Atletico buaina
Atletico Madrid-in tun season-ah an khelmuala league match li an khelh tawhah tlawm hmel an la hmu lo - vawi hnih an khingpui inhnehtawkpuiin vawi hnih an chak. Hetihrual hian inelna hrang hranga an khelmuala an match hnuhnung paliah chak hmel an hmu miah lo a, Real Madrid tan thu hriat nuam a ni.
Diego Simeone-a lu ti haitu chu a chhuanvawr Antoine Griezmann-a'n goal khung lam a ngaihsak lo lutuk hi a ni - inelna hrang hranga a inlan hnuhnung pasarihah goal a la khung lo. Kevin Gameiro, Fernando Torres leh Luciano Vietto te awm mah se Griezmann beisei phak loh laiin eng an ang ruai bik lo a, Simeone-a'n Real lakah a naute che ṭha turin a beisei ang.
Real buaina
Atletico Madrid buaina kan sawi a, Real Madrid an buai lo bik lo. Spanish champion hian an match hnuhnung pahnihah Tottenham Hotspur (3-1) leh Girona (2-1) an ngam lo a, team talbuai lai taka Atletico hmachhawn hi an ṭawngṭai
chhanna a ni lo tawp ang - Real hian an elpui ber Barcelona chu point riatin an phak lo mek tawh a, vawi khat chetsual pawh a pawi tawh ang.
A player langsar ten beisei an phak loh avangin Simeone a buai a, Zidane-a buaina a nep bik lo. Cristiano Ronaldo leh Karim Benzema ten league match sarih an khelh tawhah goal khat ve ve chiah an la khung! Real tana top scorer ni mek chu Marco Asensio leh Isco an ni a, goal li ve ve an khung tawh.
Thawnthu hlui
Real Madrid-in season hmasaa league match-a Atletico an hmachhawnah tlawm hmel an hmu lo - khualmualah an hmelma team hi 3-0 in an sawp a, Santiago Bernabeu-ah goal khat ve ve khungin an inhnehtawk bawk. Champions League semifinal-ah Madrid derby kan hmu dawn a, inkhel pahnih belhkhawmah Real-in 4-2 in hnehna an chang.
Hetihrual hian Atletico khelmuala team pahnih intawn hnuhnungah pasarihah erawh Atletico an chungnung hle - vawi khat chiah an tlawm a, vawi li hnehna changin vawi hnih an khingpui an inhnehtawkpui - Real tana chanchin lawmawm erawh Atletico player pawimawh Yannick Carrasco leh Koke te chuan hliam vangin Real an hmachhawn theih dawn leh dawn loh a chiang lo.
Atletico ngamtu Ronaldo
Tun hnaiah khawvela footballer ṭha ber dinhmun chelh mektu Ronaldo-a'n beisei phak lo mah se Atletico laka a sulhnu thlir erawh chuan mualneitu team tan Portuguese forward hi thlahdul ngawt chi a ni chuang lo - Ronaldo hian Atletico lakah goal 21 ngawt a khung tawh a, Madrid derby-ah heti zat goal khung thei dang hi an la awm lo.
Ronaldo-a'n Atletico lakah hattrick vawi hnih ngawt a siam tawh a, Atletico a hmachhawn hnuhnung paliah goal ruk a khung! Atletico goal-ah vawi 61 ngawt shot a nei tawh - heti zata tam shot hi La Liga club dang lakah a la nei ngai lo. Ronaldo-a'n a hming lo chher tawh ṭhinna Atletico Madrid lakah a hming chher nawn a duh ang.
La Liga
Zanin Inkhel Tur
Getafe 05:30 PM Deportivo Alaves
Leganes 08:45 PM Barcelona
Sevilla 11:00 PM Celta de Vigo
Atletico Madrid 01:15 AM Real Madrid
November 19, Pathianni Zan
Malaga 04:30 PM Deportivo La Coruna
Espanyol 08:45 PM Valencia
Las Palmas 11:00 PM Levante
Athletic Bilbao 01:15 AM Villarreal
Eibar 01:30 AM Real Betis