World Cup 2018 Khel tur, rin kai, draw neih hun tur
June 14, 2018 aṭangin Russia-ah World Cup khelh a ni dawn a, ram 32 an inel dawn. July 15 thleng awh tur 'The greatest show on earth (Khawvela ennawm ropui ber)' ti hiala an sawi tournament hi khawvelin a nghakhlel a, football khawvel titi tui ber a ni leh der tawh.
Ni 32 chhung khelh tur World Cup hi Russia rama khawpui 11-ah khelh kual a ni dawn a, Portugal/Spain
Belgium/Netherlands leh England ten thlen ve an dil chungin Russia-ah hian nghah a ni. Inelnaa lawmman atana sem ral tur ringawt hi dollar maktaduai 400 a tling a, champion team chuan dollar maktaduai 38 an hawn thei ang.
Dec 1-ah draw
World Cup-a group khata awm tur zawnna 'draw' hi December 1, zan dar 8:30-ah neih a ni dawn a, October 2017 FIFA world ranking milin seeded siam a ni. World Cup draw neihna tur atan hian team 32 chu pot liah ṭhen an ni a, pot 1-ah hian inelna thlengtu Russia bakah FIFA ranking-a sang zual team pasarih dah an ni.
Pot 2-ah hian a sang dang pariat dah leh an ni a, pot 3-in chutiang bawkin an zui ang a, World Cup khel tur zinga ranking hniam zual pariat chu pot 4-ah an awm thung. UEFA tiam lohin confederation khat hnuaia ramte chu group khatah dah an ni dawn lo a, chutihrual chuan UEFA hnuaia ramte chu pahnih aia tam group khatah an awm thei bik lo ang.
Rin hlawh
World champion nilai Germany chu khawvelin champion tura an beisei ber a ni a, pawisa inthapna lamah pawh Germany tluka ringtu ngah an tam lo - Joachim Low a enkawl team hian World Cup nomawi hi an chawi leh thei a nih ngat chuan 1958 leh 1962-a Pele vanglaia Brazil-in World champion dinhmun an luah hnua he dinhmun luah leh thei hmasa ber an ni ang.
Germany dawta rin hlawh chu Brazil an ni a, Neymar, Gabriel Jesus leh Philippe Coutinho te awmna a nih avangin rin an hlawh hi a awm lo hran lo. Brazil bakah hian Spain, Argentina, France, Belgium leh England chu rin hlawh zual an ni bawk.
Qualifier-a che ṭha
World Cup qualification round-ah team hmuhnawm tak tak hmuh tur an awm nual - kum 2010 hnua World Cup finals leh qualifying game-a la tlawm ngai lo Germany-in match 10 an khelhah hnehna an chang vek a, goal 43 ngawt khungin vawi li chiah goal an chhuah! Europe aṭangin Belgium, Spain leh England chu tlawm hmel hmu loa inpetkai an ni bawk.
Brazil-in qualifier match hmasa parukah vawi hnih chiah hnehna an chan hnuin coach Dunga an ban a, Tite an lalut. Tite hnuaiah qualifier match 12 khelin vawi 10 an chak a, vawi hnih chiah an khingpui an draw. Asia aṭangin Iran chuan match 18 tlawm hmel hmu lo chungin World Cup an inpetkai a, match 12 chhung chu a zawnin goal an chhuah lo. Morocco-in match rukah tlawm hmel an hmu lo a, group khata an awmpui Ivory Coast tlanpelin World Cup an khel dawn.
Vawi khatna
Nakkum World Cup khelh turah a vawi khat nana inlan tur ram pahnih an awm a, Iceland leh Panama an ni. Iceland hian Euro 2016 an inpetkai hma khan inelna liantham an la khel ngai lo a, mah se Euro-a an inlan hnuah erawh an hawikir tawh lo. Euro 2016-ah khan quarterfinal thlengin last 16-ah England an hnawt chhuak.
Central American ram Panama-in a vawi khat nan World Cup an khel ve dawn bawk a, minute 88-naa Costa Rica laka an goal khung chu an World Cup hmun tinghettu niin USA World Cup khelh loh chhan a ni bawk.
Inlan lo tur
World Cup inlan lo tur zingah vawi li champion tawh Italy tel lo turin lung a ti leng a, Netherlands inlan phak lo tur hi football ngainatu tan chuan uiawm tak a ni bawk. Czech Republic, Wales, Scotland, Austria, Bosnia-Herzegovina leh Turkey ten playoff pawh an khel phak lo a, Republic of Ireland, Northern Ireland leh Greece chu playoff-ah an tla bawk.
CONCACAF aṭangin USA chu Mexico, Costa Rica leh Panama hnuaia an awm avangin Russia an pan ve thei dawn lo a, kum 1986 hnua World Cup an khelh loh hmasak ber tur a ni. Brazil 2014-a Africa ram inlan zingah Ivory Coast, Cameroon leh Ghana te an inpetkai zo lo a, South American champion Chile tan Russia-ah hmun a awm lo.
Ticket chu
FIFA-in ticket lei dilna maktaduai 3.5 an dawng a, heng zinga 300,000 chu Luzhniki Stadium-a final khelh tur en dilna a ni - he ticket lei dilna hi October-a FIFA-in ticket lei theih thu a puana dilna a la ni chauh a, draw neih a nih hnuah ticket 622,000 chu hralhchhuah a ni. Tun thla chhung hian application lut hmasa apiangin an lei nghal zel theih turin ticket zawrhchhuah leh a ni ang.
Ticket lei dilnaa 57% chu Russian mipui aṭanga lut a ni a, category four ticket hi inelna thleng ram tana tih bik a ni. Ticket man tlawm ber, Russian mi ni loin an lei theih chu £345 a ni a, India pawisa chuan Rs. 29,680.75 a ni.