Zotlang leh Siaha an che ṭha
3rd Hrangbana Memorial Mizoram Badminton League-ah Zotlang Rockets leh Southern Acers, Siaha ten semifinal kawng zawhin match hmasa pahnihah hnehna an chang.
Group A-ah Zotlang Rockets-in Ningani zan khan Electric Veng Hall-ah Hlimen Shuttlers 3-2 in an hneh a, Zotlang hian champion lai Tuikual Shuttlers nen point ruk ve ve an hmu chiah.
Group B hmahruaitu ni turin Southern Acers, Siaha-in Chanmari Evening Stars 3-2 in an hneh bawk . MBL club thar Southern Acers hian point sarih hmu tawhin an chesual viau a nih loh chuan semifinal an thlen ngei a rinawm ta.
Thutlukna fuh lo?
Hlimen Shuttlers tan Lalmuanawma'n men's singles 2 khelin Lalawmpuia lakah hnehna a chang a, men's doubles-ah Muanawma leh Raghu te inkawp chuan hnehna an chang bawk. Hlimen thiampuipa Muanawma hi player of tie hialah thlan ni mah se an chak lohna chhanah mawhphurtua ngaih theih a ni.
Zotlang lamin F. Vanlalhriatpuii an neih an hlawkpui zel a, R. Lalbiaksanga nen inkawpin mixed doubles-ah an chak. India junior number 26 Kiran B-a'n under 19 leh men's singles 1-ah harsatna nei loin a chak ve ve a, Zotlang a chakpui bawk avangin a khel ṭha tih phat rual a ni lo.
Hlimen-in men's singles 1-ah Muanawma aiah Mizoram number 24 Malsawmsanga a lut a, Mizoram number 3 Muanawma hi lut zawk se Kiran B lakah hnehna a chan theih a rinawm. Malsawmsanga hian Mizoram number 20 Lalawmpuia lakah chakna chance a nei a, chutihrualin Hlimen-in an state pawn player Raghu chu mixed doubles-ah an risk a, chak se chuan an game plan hian fak a hlawh thung ang.
Joseph leh Siaha vannei
Southern Acers tan India number 89 Akshit Mahajan a ṭangkai a, Chanmari Evening Stars lakah mixed doubles leh men's singles la nghalin Siaha dinhmun a ṭha nghal hle.
Men's singles 2-ah Chanmari tan Joseph Lalhruaitluanga'n theihtawp chhuahin M. Joseph nen an inbei tawk; 15-13 ve ve an lak hnuah deciding set-ah Mizoram number 6 Joseph-a vanneiin 15-14 in hnehna a chang. Game thum khelh zawhah Siaha-in 3-0 in hma an hruai a, amaherawhchu Chanmari lamin men's doubles leh under 19-ah hnehna an chan avangin inkhelh zawha Southern Acers chakna zat chu 3-2 chauh a ni.