North London Derby Arsenal aia chungnung nih tum Spurs

Premier League champion tum Tottenham Hotspur chu zanin dar 6:00 hi Arsenal hmachhawn turin Emirates Stadium-ah an lenglut dawn. Arsene Wenger-a'n tun din­hmunah an mikhual tur chu team ṭha zawk an nih thu a pha lo a, an tan fiahna hun ṭha a nih tur thu a sawi bawk.

Arsenal hi league hma­hruaitu Manchester City aiin point 12 zetin an hniam zawk a, an elpui Tottenham hi point liin an phak lo bawk - zanin a chak lo zawk tan nomawi a hla tawh dawn; a bik takin Gunners tan thawh leh a harsa tawh khawp ang.

Fiahna

Arsenal manager Arsene Wenger chuan, "Ka ngaihdan chuan tun dinhmunah Totten­ham hi team ṭha zawk an ni a, chutih rualin hnehna chang turin theihna kan nei sang ve tawk thung. Match pawimawh tak tak kan neih zinga pakhat a ni a, minute 90 chhung chu khelmual chhungah kan theihna zawng zawng kan hman a ngai dawn a ni," tiin a sawi.

Arsenal hian France tan an fehchhuahna lama hliam tuar striker Olivier Giroud leh Santi Cazorla te an la chhawr thei dawn lo a, malpui leh ṭhâl na vanga chawl mek Shkodran Mustafi leh Danny Welbeck te dinhmun a la chiang lo bawk.

Wenger chuan, "Giroud a hliam a, a la inkhel theih ka ring lo," a ti. Gunners manager hian nikum October thla hnua la inkhel leh lo Cazorla-a kerek na chu hliam a hmuh tawh zinga

ṭha lo leh na ber a nih thu a sawi a, squad-ah telh theih la ni lo mah se nakkum lamah a rawn kir theih a beisei thu a sawi tel bawk.

France international Giroud a awm loh chuan Alexandre Lacazette-a'n inkhel bul a ṭan tawh tura ngaih a ni. Arsenal player manto ber hi Liverpool leh Manchester City an hneh loh ṭumin bench-ah ṭhuttir a ni. Lyon striker hlui hian league bikah goal ruk a khung tawh a, ram tana goal hnih khung hlim a nih avangin Spurs tlarhnung tana hnawk thei tur a ni.

Player thlan chungchang sawiin Wenger chuan, "City leh Reds kan hmachhawn ṭum kha inkhel bul a ṭan loh chu a ni mai a, Alexandre Lacazette chungah hian rinna ka nghat pumhlum," tiin a sawi. Arsenal tlarhmaah Alexis Sanchez, Mesut Ozil leh Lacazette ten an inkawp ngeiin a rinawm.

Spurs an ṭha

Mauricio Pochettino-a'n Tottenham a enkawl hnuah tun hnai season hnih chhungin nomawi chuh zingah an tel phak a, season hmasa khan champion Chelsea chiah an tluk lo; tun season-ah pawh champion tura rinkai zingah an tel phak.

Defender Toby Alderweireld leh midfielder Victor Wanyama ten Arsenal an hmachhawn thei dawn lo chiang a, England squad aṭanga inhnukdawk Delle Ali leh Harry Kane ten training pangngai nei tawhin captain leh keeper ni bawk Hugo Lloris leh midfielder Harry Winks te an dam tawh; World Cup khel tura Denmark hruai thlengtu Christian Eriksen an la nei cheu bawk.

Spurs manager Poch chuan, "Arsene Wenger hi manager ropui a ni a, a hnathawh ang hian Spurs tan hun rei tak thawh ve pawh ka duh. Club inel tak kan enkawl avangin hmelma kan nih a ngai a, khualmualah hian chak tumin kan lenglut ang, kan neih ṭha ber kan thawh chhuah pui dawn a ni," tiin Wenger-a naute hneh ngei a tum.

North London club pahnih hi April thla khan White Hart Lane-ah an intawng a, Poch-a naute hian 2-0 a hnehna changin kum 22 hnua a vawi khat nan Arsenal chunga awmin season an khar. Argentine manager kaihhruaina hnuaiah Spurs hian tun hma lama an tluk loh club hi an chung en tawh bik lo.