Evans rilru a dam thei lo

Northern Ireland midfielder Corry Evans chuan penalty sawisel hlawh tak avanga World Cup an khelh theih loh hnuah video technology hman a ṭula a hriat thu a sawi. Northern Ireland hian World Cup playoff-ah Switzerland an hmachhawn a, penalty sawisel hlawh tak hmangin 1-0 in an tlawm.

Playoff first leg-a ram pahnih intawn ṭumin referee chuan Blackburn Rovers midfielder Corry Evans hi handball tiin Switzerland chu penalty a pe a, mah se replay ennawn chuan ball hian Evans-a kut niloin a hnung a fuh zawk. Manchester United youth system chhuak Evans chuan, "Referee khan a tihsual kha a ennawn ve leh ngei ka beisei a, insiamṭhat nan a hman ka duhsak. Hetihrual hian video technology hi a rang lama hman a ṭul a ni," a ti.

Kum 27 mi defender chuan, "Ka tihsual vang ni miah loin penalty ka chawi a, yellow card pek zui ka ni. Ka career-a match boruak sang ber ka khelhna chance dik lo takin chhuhsak ka ni a, ka tan chuan pawm daih a harsa em em a ni," tiin a lungawi thei lo.

Hetihlai hian a hma hun chiang lo reng anga an sawi Northern Ireland boss Michael O'Neill chu Scotland chuan an ram team enkawl turin an duh a, Scottish FA chuan Northern Ireland FA hnenah an coach hi biak phalsak turin dilna an thlen mek. Kum 48 mi manager hian an ram team-ah hian kum 2020 thleng cham turin contract a nei a, kum khatah £500,000 a hlawh.