Arsenal mualah Spurs an tlawm
Premier League club inel pahnih Arsenal leh Tottenham Hotspur ten Inrinni zan khan Emirates Stadium-ah North London Derby an khel a, defender Shkodran Mustafi leh forward Alexis Sanchez te goal hmangin Arsene Wenger-a nauten 2-0 in hnehna an chang.
Arsenal hian an khelmualah a zawnin league match 11 hnehna an chang tawh, kum 2005 February-November chhunga an khelmual Highbury-a vawi 13 an chak zawn record an hnaih tawh hle. Spurs hian Emirates Stadium vawi 12 an tlawh tawhah vawi khat chiah hnehna an la chang thei a ni.
London club dang inlan Chelsea chuan 4-0 in West Brom an sawp thung. Antonio Conte enkawl team tan Alvaro Morata leh Marcos Alonso ten goal khat ve ve an khung a, Eden Hazard chuan goal hnih a khung bawk.
Ngaihdan inang lo
Tottenham defender Davinson Sanchez-a'n Alexis Sanchez a tihtluk avangin freekick a chawi a, playmaker Mesut Ozil-a ball thlawh luh mawi tak chu Mustafi-a'n a club tana a goal hmasa ber ni turin keeper Hugo Lloris dan hman loin a tauh lut.
Spurs manager Mauricio Pochettino chuan, "Ka sawifiah vak a ngai lo, a hmuna awm leh in lam aṭanga entu chuan free kick chawina tur a ni lo tih an hria a, goal khungtu Mustafi kha a offside bawk," tiin an goal chhuah danah a lawm lo hle.
Arsenal manager Wenger erawhin, "Freekick ngei tur a ni, khualmualah thutlukna dik lo kan tuar fo a, goal luh danah erawh sawi zui tur ka nei lo," tiin a sawi thung. Wenger chuan season tawp ruala an contract tawp mai tur Sanchez leh Ozil te chuan hun rei zawk cham an duh tih a sawi a, chutih rualin engtik niah nge contract an ziah dawn tih erawh a la hriat bik loh thu a sawi tel bawk.
Arsenal an hriam
Gunners tan Alexis Sanchez, Mesut Ozil leh an striker manto ber Alexandre Lacazette ten inkhel bul an ṭan rual a, Lyon striker hlui Lacazette-a'n goal khung lo mah se Sanchez goal khung tur a siam sak. Chile international Sanchez-a'n an goal thumna khung theihna hun ṭha nei mah se Spurs keeper Hugo Lloris chiah vawi hnih a hmachhawnah a paltlang zo lo - Germany international Ozil chu Gunners goal nawrna thapui leh inkhel khaikhawmtu pawimawh a ni bawk.
Tottenham tan England squad aṭanga inhnukdawk Harry Kane leh Dele Alli te inlan thei mah se beisei an phak lo, England international pahnih hi Fernando Llorente leh Son Heung-min ten rawn thlakin South Koren tlangval Son hian hnai tak aṭangin a pet over a, defender Eric Dier-a tauh luh ngei tur nia lang chu Arsenal keeper Petr Cech-a'n a dan sak bawk.