AFC Level 1 Futsal Course zo

Asian Football Con­federation Level 1 Futsal Course chu November 13-18, 2017 chhung khan Ramhlun Sports Complex-ah neih a ni a. Futsal coach mi 10-in course hi an zo thei a, AFC Elite Instructor Steven Knight leh Assistant Instructor Ra­jeev PK-ten an zirtir a ni.

Kharna inkhawmah Australian Futsal coach Steven Knight chuan, "Mizoramin Futsal coach ṭha tak in nei tur hi ka lawmpui che u a, kan course chhungin thil lawmawm tam tak ka hmu a ni," tiin a sawi.

Steven chuan, "India hi AFC Futsal Cham­pionship hrang hrangah a tel ve a hun tawh a, All India Football Federation pawhin ṭan a la a, AFC lamah pawh ka report-ah ka telh ang. Chutih hunah chuan Mizoram chu India aiawh turin in lo inpeih tawh dawn a ni. Coach in nei dawn a, player in nei a, Futsal League neih in tum tih ka hre leh zel a, a lawmawm takzet a ni," a ti.

Assistant Instructor, Kerala lam mi Rajeev chuan Futsal Course vawi thum a tel ve tawhnaah tun ṭum chu a ṭha leh hlawhtling bera a ngaih thu a sawi a, Mizoram Football Association ruahmanna chu a fak.

MFA aiawha thu­sawitu honorary secretary Lalnghinglova Hmar chuan, "Mizoram hi India rama Futsal lama hmahruaitu nih tumin kan tang a, AFC leh AIFF-in min duhsak a, he course min thlentir hi kan lawm takzet a ni. January ah Futsal League kan tan dawn a, kan coach-te hi an la ṭangkai chho dawn chauh a ni," tiin a sawi.