Man United tan Pogba leh Zlatan an kir

Old Trafford-ah Manchester United-in Anthony Martial (37'), Chris Smalling (45+1'), Paul Pogba (54') leh Romelu Lukaku (70') te goal hmangin Newcastle United 4-1 in an hneh. Mikhual Newcastle hian Dwight Gayle hmangin Inrinni zan inkhelah goal khung hmasa mah se Pogba uapna hnuaia khel United hian talbuai phah loin goal liin an chhanglet.

French midfielder Pogba hian Martial goal khung tur a siam sak bakah goal a khung bawk a, man of the match atan thlan a ni. Kum 24 mi Pogba rawn let takah chuan Lukaku pawhin September 30 hnuah league-ah goal a khung leh ta bawk. Swede forward Zlatan Ibrahimovic pawh thla sarih a chawlh hnuah beisei aia hmain a dam a, hun tawp lam minute 14 khelin a thiam a la theihngilh lo.

United hian Old Trafford-ah match 38 chhung hneh loh an tawng tawh lo a, hei hi club record a ni. Portuguese manager Jose Mourinho chuan, "Pogba thiamna hi chu mi pangngai chunglam a ni. A khelh danah hun rei tak chawl tih a hriat loh. Season ṭantirh khan Matic nen an inkawp rem em em a, a awm lo pawh kan tuar khawp mai. Tunah chuan a rawn let leh tawh a, kan goal nawr pawh a na sawt a ni," tiin a sawi.

Kum 36 mi Zlatan-a chungchang sawi zuiin Mourinho chuan, "Kan player inhliam te an rawn let hi a lawmawm a, a bik takin Zlatan rawn let hian minti lawm lehzual a ni. Hliam lian tak a tuar chung pawhin puitling takin a taksa a enkawl a, rawn inkhel leh thei tura a paltlang hi a awlsam lo a ni," tiin a fak.