AFC chak tluang lai titawptu Ramhlun N

Mizoram Premeir League Sea­son 6 league round chu goal ropui hmanga khar a ni. Zirtawpni zan inkhelah Tuikual North tlangval Lalremruata goal hmangin Ramhlun North-in I League champion Aizawl FC 1-0 in an hneh.

Aizawl FC hian Lungleia Mizoram Police nen an inhneh­tawk hnuah match nga chhung an chak zawn tawh a, he record duhawm tak hi Ramhlun North hian an thai chhiat sak ta a ni.

Samson Ramengmawia kaihhruai Ramhlun North hian semifinal khelh an phu tih an match hnuhnung ber thlengin an pho lang a, amaherawhchu round 13-a Chanmari FC an inhnehtawk avangin panganaah an lungawi a ṭul ta a ni.

I League champion Aizawl FC hian semifinal-ah vawi khat knockout stage luhna Mizoram Police an hmachhawn ang a, league-a pakhatna Chhinga Veng leh palina Chanmari FC te an inkhel bawk ang.

Semifinal hi double leg-a khelh tur a ni a, final hi December 8, Zirtawpni-a khelh tur a ni.