Madrid Derby-ah goal a lut lo
Inrinni zan khan football ngainatute nghahhlelh Madrid Derby khelh a ni a, beisei erawh a phak lo - goal lut loin Atletico Madrid leh Real Madrid an ṭin a, Cristiano Ronaldo-a'n tun season La Liga-a goal khat chiah a la khung a belhchhah thei lo.
La Liga hmahruaitu Barce-lona erawhin an chak kaltluang lai an chhawm nung zel a, match 12 chhung tlawm hmel an hmuh lohna ni turin Leganes chu 3-0 in an sawp. Barca tan Luis Suarez chuan goal hnih a khung bakah Paulinho chuan goal khat a thawh ve bawk.
Madrid Derby
Wanda Metropolitano-a Madrid Derby hmasa berah chance ṭha ber tia sawi theih chu Angel Correa koah a tla a, mah se Raphael Varane tihsual nangchingtu winger hian tibuaitu awm lo karah goal a khung thei lo. Kevin Gameiro-a chip ṭha tak chu Varane hian a tihsual thup nan line aṭangin a pet chhuak a, Real tana Toni Kroos hun ṭha neih chu Jan Oblak chuan ṭha zetin a dan sak.
Real tana chanchin lawmawm lo dang chu captain Sergio Ramos chu a hnarah hliam a tawrh avangin lakchhuah a ngai a, Real boss Zinedine Zidane chuan a player hi a chawlh hun chhung tur a hriat theih loh thu a sawi. Real tan an league match hnuhnung pariata goal khat ve ve chiah la khung Karim Benzema leh Ronaldo hmuh tur mang an awm lo a, Atleti tan Antoine Griezmann chuan match riat chhung chu goal a khung ta
lo bawk.
Barca tan Suarez
Catalan club-in an khingpui pahnihte inhnehtawk hlanin chak loa hun hman an duh lo a, an mikhual Leganes lakah zahngaihna an lantir lo - inelna hrang hranga minute 479 chhung goal a khung tawh loh avanga sawisel hlawh Luis Suarez-a'n amah sawiseltute a chhanglet a, goal hnih a khung.
Paulinho-a'n minute 90-naah an goal thumna a khung a, Lionel Messi siamsak a ni. Ernesto Valverde enkawl Barca hian league match 12 chhung chu tlawm hmel an hmu ta lo a, La Liga chanchina season bul an
ṭan ṭhat ber ṭum a ni. Hetihlai hian Barca defender Gerard Pique erawh yellow card a chawi avangin karleha Valencia nen an intawn hunah a inlan thei lo ang.
Inkhel Results
Girona 1 - 1 Real Sociedad
Getafe 4 - 1 Deportivo Alavés
Leganés 0 - 3 Barcelona
Sevilla 2 - 1 Celta de Vigo
Atlético Madrid 0 - 0 Real Madrid