Milan aia hriam zawk Napoli

Italian Serie A hmahruaitu Napoli chuan an mikhual AC Milan lakah 2-1 a hnehna changin league hmahruaitu an nihna an sawh nghet, champion lai Juventus aiin point liin an sang zawk - Turin club hian match khata an khelh tlem zawk avangin an inthlauhna chu la danglam leh thei a ni.

Lorenzo Insigne chuan World Cup khel turin Italy hruai thleng zo lo mah se a club tan a hlutna a nep chuang lo, Inrinni zan inkhelah Italy international hian minute 33-naah goal hmahruai a khung, he goal hi offside niin lang mah se Video Assistant Referee hman a nih hnuah pawm a ni.

Chawlhlawk hnuah Piotr Zielinski-a'n an goal hnihna a khung a, hun tawp dawna defender Alessio Romagnoli goal khungin Milan a chhanhim zo tawh lo.

AC Milan hian nipui bazarah khan player thar 10 chuang lakluh nan pound maktaduai 210 vel zet an hmang a, mahse khelmual chhungah beisei an phak lo; point 19 hmuin table-ah pasarihna an ni mek.