Indian Super League-ah goal lut lo

Zirtawpni zan khan Indian Super League khelh ṭan a ni a, match hmasa berah Kerala Blasters leh Atletico de Kolkata inhmachhawn nghalin goal a lut lo. Kochi khawpuia inkhelah Kerala tan Lalruatthara'n inkhel bul a ṭan a, Aizawl FC defender hlui hian ISL boruak sangah a khel chhe lo.

Inrinni zan inkhelah NorthEast United chuan ISL club thar Jamshedpur FC an mikhual bawk a, minute 77-naah JFC defender Andre Bikey hnawhchhuah ni mah se Highlanders hian goal an khung thei chuang lo. NorthEast United tan Robert Lalthlamuana chuan captain armband a hreng a, Mizo player zinga ISL club captain ni thei hmasa ber a ni.

Guwahati club tan hian Lalrindika Ralte a inlan bawk a, Jamshedpur tan Jerry Mawihmingthanga chuan inkhel bul a ṭan bawk. Nizan ISL-ah inkhel pahnih a awm a, he thuziah lai hian an result kan hre hman lo.