Liverpool tan Mo Salah

Kum 2017-a a vawi khat nan Liverpool chuan a zawnin vawi thum chak hmel an hmu ve ta - Inrinni zan khan an mikhual Southampton chu 3-0 in an sawp a, Mohamed Salah chuan goal hnih khungin Philippe Coutinho-a'n goal khat a thawh ve bawk.

Egyptian winger Salah-a'n Premier League-ah match 12 khelin goal kua a khung a, Liverpool legend Robbie Fowler-a'n a league match hmasa 12-a goal riat a khung chu khumin Reds player zinga league goal kua khung tling thei hma ber record a siam.

Salah hian tun season inelna hrang hrangah goal 14 a khung tawh a, Premier League player zingah tun season-a goal khung hnem ber dinhmun a chelh mek. Salah goal hnihna kha Coutinho-a'n ṭha zeta a siam sak a ni a, Brazil international hian Reds tan assist vawi 31 nei chiahin a chunga awm chu Steven Gerrard (92) leh Steve McManaman (58) te chiah an ni.

Liverpool boss Jurgen Klopp chuan, "Team pahnihin goal khung tum ve vein kan khel a, goal kan khung hma khan chance kan ngah zawk. Kha aia tam zawk goal khung thei kan ni a, kan tan vawiin hi ni duhawm tak a ni," tiin hnehna an chan avanga a hlim thu a sawi.