MBL group A pakhatna Zotlang

Zotlang Rockets-in Kiran B zarah champion lai Tuikual Shuttlers 3-2 in an hneh a, 3rd Hrangbana Memorial Mizoram Badminton League group B-ah hmahruaitu an ni.

Zirtawp zanah MBL champion hmasa ber Hlimen Shuttlers-in beiseina chhi nung turin Brig & Mrs T Sailo, Kanan chu 3-2 in an hneh. Hlimen tan tawnhriat nei ṭha Lalmuanawma chu men's doubles leh mixed doubles-ah lutin hnehna a chang ve ve a, player of the tie-a thlan rawlthar duhawm Joseph VL Ringngheta'n Under 19-ah hnehna a chang bawk.

Hlimen-in state pawn aṭanga an lak Raghu M ṭhat tawk loh an tuar a, an chakna zat a tam loh avangin Inrinni zan inkhelh zawhah semifinal beiseina a tawp zui bawk. Tuikual leh Zotlang inkhelh ṭuma chak zawk zawnna chu men's singles 2 a ni a, Kiran B leh Mizoram number 2 Samuel Lalnunmawia te inkhel a hmuhnawm takzet.

Tuikual player Samuel-a'n set hmasa ber 15-11 in a la a, set hnihnaah pawh 13-12 a nih laiin Mizoram number 2 hian point pawimawh a hmu. Amaherawhchu Zotlang lamin an sawisel hnuah umpire-in thutlukna a thlak a, Samuel-a'n ngai a awh tawh lo. Kiran B-a'n set hnihnaah 15-14 in a lehthal a, deciding set-ah 15-9 in a chak. He inkhel hian sawi zui a hlawh a, mipui thawm a ṭha a, Samuel-a pawhin inkhelh zawhah a lungawi lohna a lantir zui bawk.

India junior number 26 Kiran B hian Zotlang chakpui turin Under 19-ah Lalmuanawma Sailo chu a hneh leh bawk a, Mizo rawlthar Muanawma'n huaisen takin a bei let a, inkhel hmuhnawm tak a ni.