Djokovic tan chanchin lawmawm

ATP Finals a match hmasa berah Novak Djokovic chuan Stefanos Tsitsipas a hneh. Serbian star tan hnehna chan hi a lawmawm - Australia tualchhung media lam thu chhuah avangin a lawm zual ngei ang.

Tun season tirah khan Djokovic hian Australian Open a khel thei lo, season tharah erawh a khel thei dawn niin Australia rama an media-te chuan an tarlang. Novak ṭantuten nakkum January thla an nghakhlel zual dawn.

Thawhṭanni zan khan Turin khawpuiah ATP Finals khelh a ni a, a thiam zual inelna match hmasaah Djokovic hian Tsitsipas chu 6-4, 7-6 (7-4) a hnehin inelna bul a ṭan fuh hle, semifinal lut tur erawhin vawi khat chak a la mamawh.

Kum 35 mi Djokovic hian ATP Finals nomawi hi vawi nga a chawi tawh, champion hnem ber Roger Federer tluk turin vawi khat champion a la ngai, kumin hi atan hun ṭha tak a ni thei ang.

Group match inkhel dangah, Russian tlangval Andrey Rublev chuan a hnampui Daniil Medvedev lakah set hmasa hloh mah se 6-7 (7-9), 6-3, 7-6, (9-7) in hnehna a chang let ve bawk.

Thawhṭanni zan khan Red Group-a awm player pali - Djokovic, Medvedev, Andrey Rublev leh Stefanos Tsitsipas te an inlan kim a, zanin hian an group match hnihna atan an inlan chhunzawm leh ang.

Green Group-ah Rafael Nadal, Casper Ruud, Felix Auger-Aliassime leh Taylor Fritz te an awm thung a, nizan khan an match pahnihna khelin result kan hre hman lo, group pakhata player pali awmte hi vawi khat ṭheuh an inkhel kual dawn.

An inkhelh kual vek hnuah a sang pahnih zelin semifinal an lut dawn a, knockout a ni tawh ang. Seeded pakhatna Nadal hian tun hmain ATP Finals nomawi hi a la chawi ngai lo, kuminah a vawi khat nan chawi a tum dawn a ni.