Neymar leh Marquinhos an thleng tlai

World Cup champion hnem ber, vawi nga champion tawh Brazil chuan Thawhṭanni aṭang khan training an nei ṭan a, a ni hmasa berah hian Neymar leh Marquinhos te chu midang aiin an thleng tlai.

Paris khawpui aṭangin Paris Saint Germain player pahnih hian an training-na hmun Turin, Italy an pan, thlawhthleihna chungchangah harsatna an neih avangin a hunah tak an thleng ve thei lo a ni.

Tite-a naute hian Juventus training-na hmunhma an hmang hawh a, hetah hian player thlan chhuah 26 te chuan inbuatsaihna hun an hmang ang. Training ni hmasa berah hian Tite chuan, a player zingah kar tawpa an club tana inlan lo player 14 te chu inbuatsaihna a neih pui nghal.

Brazil tenchnical staff lamin an tarlan dan chuan Turin khawpuiah hian ni hnih chhung chu inkhel loin an training phawt ang, a ni thumna aṭangin inkhel tak tak tur angin an inbuatsaih dawn a ni.

World Cup apianga la inlan ziah thei awmchhun Brazil hian an match hmasa ber atan November 24, Ningani hian Serbia an tum dawn. Group C-ah Switzerland leh Cameroon te an hmachhawn leh bawk ang.