Suns aia sa zawk Heat

Bam Adebayo-a'n point 30 a neih zinga 14 zet chu quarter hnuhnung bera a thawh chhuah a ni a, inkhel inhnehtawk leh hmuhnawm takah a team Miami Heat chu Phoenix Suns lakah 113-112 in hnehna a chanpui.

Hun tawp dawnah Suns lamin remchang an nei, mahse Devin Booker a che fuh tlat lo. Point 25 neitu Booker hian hun tawp hma second 6.2 chauh awm tawhah shot tuma a zuang chu Jimmy Butler-a'n a lo dansak.

Booker bawkin ball a chang chhunzawm, insiamrem nghalin 3-point neih tumin a shot a, hun tawp hamrik rik ruala a shot hi a lut lo hlauh. Lut ni se la chuan Heat tan sut lehna hun a awm tawh dawn lo, mahse a hun ṭha neih a khawhral a ni.

Nimin zing NBA regular season inkhel dangah, team hmuhnawm Boston Celtics chuan Jayson Tatum-a point 27 hmangin Oklahoma City Thunder chu 126-122 in an hneh ve bawk a, vawi 11 zet an chak tling ta.

Eastern Conference table-ah Celtics hian hma an hruai, an hneh tak Thunder hi Western Conference table-ah chuan 13-na an ni thung a, a thiam zual pariat inelna playoff khelh phak a harsa dawn niin a lang.