China-ah badminton khel thei dawn lo

Badminton World Federation chuan, hripui leng vangin China khawpui pakhat Guangzhou-ah BWF World Tour Finals an khel thei dawn lo tih an sawi a, inelna hi Bangkok, Thailand-ah khelh a ni zawk dawn.

Badminton thuneitu sang ber BWF chuan thu chhuah siamin, "BWF chuan Chinese Badminton Association (CBA) nen HSBC BWF World Tour Finals 2022 chungchang kan sawi a, tun dinhmunah hripui leng vangin Guangzhou-ah inelna a awm thei dawn lo.

"Tournament hi Bangkok-ah December 7-11 chhung hian khelh a ni ang. Ruahmanna hmasa aiin chawlhkar khatin a ṭan hun a hma dawn, hei hi stadium a remchan zawkna vang a ni," an ti.

Tuna world ranking awm dan chuan - India player zingah HS Prannoy leh PV Sindhu te chiah an inlan phak dawn. Olympic medal vawi hnih la tawh Sindhu hi Commonwealth Games hnuah a kerek vei lam hliam vangin a la inkhel leh lo, season tawp inelna pawh hi a hmachhawn theih a rinawm loh a ni.