Koh loh Ramos a lawm lo

Sergio Ramos chuan World Cup khel tura an thlang ve lo chu na a tih thu a sawi. Kum 36 mi a nih tawh avangin Qatar World Cup bak hi chu atan football inelna lian ber khelh beisei ngam chi a ni tawh lo ang.

Season hmasa khan Ramos hi a chawn hliam vangin Paris St Germain tan a khel tam lo, tun season kal laiah erawh PSG tana player ṭangkai leh thawhhlawk a ni phak a, hei vang hian ram tana inlan pawh a beisei thar hle.

Mahse, Spain coach Luis Enrique-a'n Qatar pan tur player 26 a thlan chhuah zingah a tel lo. Ramos bakah hian midfielder Thiago Alcantara, defender Marcos Alonso leh goalkeeper David de Gea te chu koh loh langsar an ni.

Ramos chuan, "Hliam avangin ka buai rei a, rilru pawh a hrehawm ve hman hle. Mahse, vanneih thlak takin season ṭha takin ka hmang ve leh thei ta a, tun hma angin nuamti takin football ka khel ve leh thei tawh.

"World Cup khelh hi ka duhthusam leh engtik lai pawha ka duh a ni. Thlan ka ni ve lo hi hrehawm ka ti, chutih rualin ni thar duhawm zawk a lo la chhuak ve leh ngei ang, ka rilru put hmang chu a danglam phah lo ang," tiin a sawi.

Ramos hian 2010 World Cup-ah khan Spain a lo champion pui tawh. Spain hian group E-ah Costa Rica, Germany leh Japan an hmachhawn dawn. World Cup inbuatsaih nan Ningani hian Jordan chu friendly match an khelhpui ang.