Ni khat atan MPL round khat ; A ruh no no an chhuak dawn

Zote Honda MPL9 league round khar nan round hnih chiah a awm tawh a, vawiin hian RG Stadium-ah round khat khelh zawh a ni ang a; November 19, Inrinniah league round khelh zawh a ni ang. Tun season hi MPL awm tawh a, semifinal inchuh boruak san ber ṭum a ni.

Police 'B' Team
Mizoram Police-in point 19 an hmu tawh a, pathumnaah awm mek mah se panganaa awm Chawnpui FC aiin point hnih chauhin an hmu tam zawk. Tukin zing hian Police team ṭhain Mizoram chhuahsanin Sikkim an pan dawn a, vawiin chhun dar 11:00-a FC Bethlehem hmachhawn turah goal sarih khung tawh Malsawmfela leh goal li khung tawh Lalnunsanga (Talea) te an awm lo.

Bethlehem hmachhawn tur hian MPL top scorer ni tawh Lalbiakhlua (Biaktea) bakah Lalbiakhlua (Hlutea), Ronald Zothanzama leh B. Zoramthara (B. Sena) te an awm a, Police team ṭha ber an ni dawn lo. Amaheawhchu, Police coach Lalbiaksanga Colney chuan, "Bul ṭan tur zingah hian player pahnih bak MPL khel lo an awm lo ang. Kan naute an ṭha a, kan ringtawk. Kan tel lo chung pawhin result ṭha tak an nei thei ang," tiin a naute chunga rinna a nghah thu a sawi.

Bethlehem hi relegate thei dinhmunah an ding a, Victor Lalbiakmawia hote tan hun ṭha bawhpelh loh a ṭul. Mahse, FCB hian match hnuhnung berah Aizawl FC an hmachhawn a, goal sarih ngawt an chhuah. Chutihrualin kim ve vein khel se Police rinkai zawk an ni dawn a, vawiinah erawh Bethlehem buk a rit ta zawk.

Chhingcows tan hun ṭha
Aizawl FC-in nimin tlai aṭangin I League an khel ṭan a, Zirtawpni hian Gokulam Kerala an hmachhawn lehnghal dawn. Vawiin tlai dar 1:30-ah AFC hian Chhinga Veng an hmachhawn dawn a, I League-a inlan lo player-te an khel ang.

Khawzawla team pahnih inhmachhawn ṭum khan Chhinga Vengin rang takin goal hnih an khung nghal a, I League club hian an sut ve ve. Team pahnihin point khat ve ve an hmu. Chutihrualin Aizawl FC hi kim loin khel dawn mah se an squad a chhah ṭha. MPL club dangah hian Aizawl FC squad chang pha loten hmun pawimawh an chang pha tih hriat a ṭha a, Chhingcows tan zuam ngawt a rem lo.

Venghnuai hun
Vawiin tlai dar 4:00 hian FC Venghnuaiin an veng pa Lalremtluanga enkawl Electric Veng an hmachhawn dawn. RG Stadium-ah Venghnuai mipui an tam dawn a, chutihrualin coach RT-a'n an veng club hi point thum a pek phal ring suh - point laksak ngei a tum dawn.

Electric Vengin match hnuhnung berah Mizoram Police an hneh lo a, Venghnuai pawh an elpui Chawnpui nen an inhnehtawk. EFC hi relegate tura an dinhmun a ṭhat thawkhat tawh avangin Venghnuai hian chak châkna an nei lian zawk dawn.

Mangṭha Chanmari?
Tualchhung football ngainatuten MPL aṭanga Chanmari FC tlak hi an hlau, a chhan chu CFC hi MPL club ngelnghet berte zinga mi an nih vang a ni. Zanin dar 7:00 hian Chanmari FC-in an coach hlui Lalsangzuala Hmar enkawl Chawnpui FC an hmachhawn dawn a, MPL-a inhamtang turin chak ngei a pawimawh.

Chanmari hi an chak lo a, Bethlehem an chak si chuan MPL knockout stage thleng ziah team hi an relegate dawn tihna a ni a, Chanmarians tan zanin hi hun pawimawh a ni. Coach K. Malsawmkima'n hnehna chang turin theihtawp a chhuah dawn a, mipui thlawpna a mamawh bawk.

Chutihrualin Chanmari ang thoin Chawnpuiin point thum an mamawh a, Sanga hote point mamawhna erawh semifinal luh nan a ni. Khawzawla team pahnih an inhmachhawn ṭum khan MC Malsawmzuala freekick hmangin Chanwpui an chak. Siaha tlangval MC-a hian tun inelnaah goal sarih a khung tawh a, Chanmari tlarhnungin an ven uluk a ṭul ang.