Table tennis-ah Mizo hming a mawi

Mizoram table tennis association-in NE Olympic Games-ah infiammi pariat an tir a, medal an lak zat chu 10 a ni - Mizoram team hian table tennis-ah pawh ngaihhlut hlawh Men's Singles, Men's team, Women's team leh Men's doubles-ah te gold medal an la thei.

Thawhṭanni zan khan Men's Singles-ah Alberto LR Ruata leh R. Lalruatsanga te an intawng a, NE Olympic Games inelna final-a Mizo intawng awmchhun an ni - a tawpah Mission Veng tlangval Alberto a chungnung zawk a, gold medal a hlawh chhuak a, Venghnuai tlangval Lalruatsanga'n silver medal a dawng.

Indoor Hall, NEHU, Shillong-a neih inelnaah hian Thawhṭanni zan vekah Lalthansangi sailo chuan women's singles semifinal khel mah se hnehna a chang zo lo a, bronze medal-ah lungawi a zir.

Mizoram table tennis team assistant coach Lalneihkimi chuan, "Mipa lama kan result hi kan beisei dan sa a ni a, hmeichhe lam erawh kan number 1 Lalthansangi Sailo-in a banah hliam a nei a, singles leh mixed doubles lamah kan beisei ang result kan neih theih loh phah a ni," tiin Vanglaini a hrilh.

Mizoram Table Tennis Men's Team
Hming Khua/Veng
John Zamliana Tuikhuahtlang
Alberto Lalremruata Mission Veng
R. Lalruatsanga Venghnuai

Mizoram Table Tennis Women's Team
Hming Khua/Veng
Lalthansangi Sailo Armed Veng
Lalmuanawmi Hlimen
Malsawmtluangi Mission Vengthlang
Vanlalnghaki Lunglei
Manager R. Lallunghnema, Model Veng
Coach Lalngainatawma, Tuikhuahtlang
Asst. Coach Lalneihkimi, Kanan Veng