NE Olympic Football final Chawhnu dar 1-ah Mizoram Vs Meghalaya

NorthEast Olympic mipa football final-ah vawiin tlai dar 1:00 hian Mizoram leh Meghalaya te an inkhel dawn a; MFA Turf, Polo-ah inkhel hmuhnawm thlir tur a awm ang.

Mizoram hian final lut turin match thum lek aṭangin goal 10 an khung a, goal khat chiah an chhuah. Inelna hi kum 21 hnuai lam inkhel a ni a, Mizoram Premier League khelh mek a ni nachungin Mizoram squad a chhah ṭha hle.

Mizoram manager K. Lalenghluna (Maenga) chuan, "Champion tumin Meghalaya kan pan a, inelna thlengtu nen gold medal kan inchuh dawn. Kan theihna zawnah chuan kan theihtawp kan chhuah a, champion ngei pawh kan inring. Chutihrualin Pathian awmpuina kan mamawh a, Mizo mipui ṭawngṭaipuina kan mamawh hle a ni," tiin Vanglaini a hrilh.

Inelna thlengtu Meghalaya hian Shillong Premier League khel zo hlim player an thlang a, Shillong Lajong-in player ṭhahnem tak thawhin player-te an inhrechiang. Final thleng turin Meghalaya hian Manipur 3-0 in an hneh a, hei hian an ṭhatzia a pholang. Mipa football final hi a hmuhnawm ang.

Group Stage
November 9, Nilaini
Mizoram 6 - 0 Assam
MIZ : Joseph Lalvenhima 18', 25', 37', 62'; K. Lalrosanga 47'; Rohlupuia 51'
November 11, Zirtawpni
Mizoram 1 - 0 Manipur
MIZ : Rohlupuia 50'

Semifinal
November 9, Nilaini
Mizoram 3 - 1 Nagaland
MIZ : Joseph Lalvenhima 22'; Aron Vanlalrinchhana 39'; Rohlupuia 51'
NAG : Pursun 11'

Final
Vawiin Inkhel Tur
Mizoram 1:00 PM Meghalaya