Wrestling tan medal 10, beisei tur a la awm

Mizoram lamah title fight neih avangin Mizo wrestler ṭha engemaw zatin NE Olympic Games hmang thei lo mah se, Shillong khawpuiah Mizo wrestler-ten medal lak an tim phah lo.

November 14, Thawhtanni khan Mizo wrestler-ten inelna hmachhawn tanin, Lalchhuanawmi (-53kg) leh Lalzahawmi (-59kg) ten silver medal hlawh chhuakin, Jenet Lalthakimi (-50kg), Lalnunpuia (-57kg) leh Lalhruaitluanga (-61kg) ten bronze medal an hlawh chhuak bawk.

Nimin khan Polo Ground, Shillong-ah inelna neih chhunzawm niin, Vanlalruata'n (-65kg) silver medal a hlawh chhuak ve leh a, Dominic Zarzosanga (-70kg), K. Vanhnuaithanga (-74kg), Janet Zomuanpuii (-55kg) leh K. Lalhriatpuii (-57kg) ten bronze an hlawh bawk - wrestling team hian vawiinah inelna hmachhawn tur an la nei a, an dinhmun tur a chiang ang.