Mizo Inchai Chhanhima hmaah AwP-a

Mizo inchai pate champion lai, kum 2014 aṭanga kawnghren (title) humhim char char tawhtu Lalchhanhima'n zanin hian fiahna a hmachhawn dawn, a title kawl lai chu B. Lalawmpuia nen an inchuh dawn a ni.

Dawrpui Multipurpose Centre-ah zan dar 8:00 aṭangin ennawm chhuah a ni dawn, pate title fight hma hian nute title fight hmuh tur a awm dawn bawk - Lalvenhimi leh Lalnuntluangi te chuan title an inchuh dawn bawk.

Pate leh palaihawl ten exibition match an khel dawn bawk a, a tir aṭanga a tawp thlengin a hmuhnawm vek ang. A hmunah ticket lei tur a awm a, TV lamah Zonet lamin an live bakah, online a en duh tan Zonet Empaiah a en theih bawk ang.

Saitual tlangval Chhanhima hi a naupan lai aṭanga inchai tui min a ni, a ṭhianten football a khelh laia midangte nen khelmual sir phula inchai tawh ṭhin a ni. A tuina tak inchai a luhchilh hnuah hnunglam a hawi tawh lo.

Mizoram huap inelna hrang hranga gold medal 38 la tawh Chhanhima chuan, "Inbuatsaihna ka nei ṭha tawk, mihring taksa fit an sawi ang zawng zawng hi chu ka nei kim, ka title kawl lai hi humhim leh ngei ka tum dawn," tiin a sawi a, a inringtawk hle.

Mahni in zo leh insawizawi nasa a ni a, kum 2018 khan minute khatah Push-up vawi 85 tiin Mizoram record a lo siam tawh a, sipaia a luh hnuah pawh physical instructor ni chhunzawmin, nitin zing leh tlaiah training a la nei ṭhin.

Pate champion nih tum tur B. Lalawmpuia hi awlsam taka nuai liam mai theih erawh a ni dawn lo. 5ft 6in a sang AwP-a hi 61kg a rit a ni a, a khingpui tur aiin 1inch in a hniam hret a, 3kg in a sang zawk bawk - a pian phung enin a in fit ṭha tawk tih a chiang.

Thenzawl tlangval chuan, "Mizo inchai pate champion ni turin ka inbuatsaih ṭha a, champion lai hneh turin ka inringtawk," a ti. Mizo inchai title fight a hmachhawn vawi khatna a ni dawn a, tawnhriat ngah Chhanhima hmaah a fimkhur a ngai dawn.

Mizo inchaiah sulhnu a la nei lo, mahse wrestling huangah erawh a mikhual lo. State pum huap inelnaah gold medal 30 leh bronze medal pakhat a la tawh, kum 25 mi Mizo tlangval hian a hma a ding a hneh hnem tawh a, atan zanin hi thil huphurhawm a ni hran lo ang.

Zanin Inchai Tur (8:00 PM)
EXHIBITION MATCH: PATE
Lalkhawngaiha, Venghlui vs Lalrinchhana, E. Lungdar

EXHIBITION MATCH: PALAIHAWL
Lalrintluanga, Kolasib vs Lalrinsiama, Tachhip

TITLE FIGHT: NUTE
Lalvenhimi, Bethlehem Veng Vs Lalnuntluangi, Kolasib

TITLE FIGHT: PATE
Defending Champion Challenger
Lalchhanhima, AR Saitual Vs B. Lalawmpuia, Thenzawl

Zan Thumna - November 17, Ningani (8:00 PM)
Main Event & Closing Ceremony

EXHIBITION MATCH: PALIAN
C.Lalrinawma, Kolasib Vs R. Lalrinawma, E. Lungdar

EXHIBITION MATCH: PALAIHAWL
Ronnie Zorinpuia, Thenzawl Vs Lalmuanpuia, Tachhip

TITLE FIGHT: NULIAN
Lalhmangaihsangi, Dilkhan, Saitual Vs Lalsiamthari, E.Lungdar

TITLE FIGHT : PALIAN
Defending Champion Challenger
Lalsangliana, Upper Republic Vs Lalnunfela, Salem Veng