Milan Derby Inter hmaa ding tur Milan

Pathianni zan dar 1:15 hian Italian Serie A lamah inkhel hmuhnawm leh ngaihven hlawh bik a awm dawn, champion tum Inter Milan chuan khelmual an 

inṭawm pui AC Milan chu San Siro-ah an mikhual ang.

Antonio Conte kaihhruaina hnuaiah Inter Milan an indin thar a, league champion nih tum ngam niin pahnihna an ni mek. Milan hi tlahniam deuh mah se tun hnaiah an khel ṭha tluang viau, an match hnuhnung paliah chak loh an nei lo.

Conte-a'n Milan derby a hmachhawnna hmasa ber tur a ni a, a boruak a danglam ang. Derby bik a vawi khat hmachhawnna tur ni mah se Juventus a enkawl lai 

aṭang tawhin Milan lakah a la tlawm ngai lo.

Thlasik bazarah Conte hian Christian Eriksen, Ashley Young leh Victor Moses te a lalut a, tun ṭumah hian player pawimawh an ni ang. Striker Romelu Lukaku a rintlak a, season hmang ṭha tak Lautaro Martinez erawh hrem vangin a inlan thei dawn lo thung.

Goalkeeper Samir Handanovic chu hliam vangin a dinhmun a la chiang lo, Udinese an hneh ṭuma si ban nghaktu Daniele Padelli kha 2016 August thla hnua a league match khelh hmasak ber a nih chauh avangin inkhel boruak sangah rin ngam a har deuh mai thei.

Kum 38 mi ni tawh mah se Zlatan Ibrahimovic-a'n a thiam a la theihnghilh lo a, Swede striker hi a la rintlak reng - Milan khawpuia a kir leh hnuah phurna nasa tak a siamsak a, tun ṭuma a hmachhawn tur Inter hi a club hlui a nih bawk avangin mipui mit fukna tur a ni dawn.

Ibra hian Milan derby vawi li a khel tawh a, goal li a khung; a goal khung hnuhnung ber chu 2012 May thla daih tawh kha a ni thung. Milan hian an player langsar zingah chhawr theih loh tur an nei lo, point mamawh an nih bawk avangin chak an tum ang.

Milan-in Inter an phak lohna hi point 19 zet a ni mek a, an tan sawrzim theihna hun a ni ang. Milan derby bakah Italian Serie A season kal lai hian ngaihven a hlawh, match 17 tlawm loa kal tluang Lazio leh match kua a zawna goal khung tawh Cristiano Ronaldo awmna Juventus te pawh an inlan dawn.