Spurs hnung zui tur Real Madrid?
Champions League nomawi chawi hnem ber Real Madrid chuan zanin dar 1:15 hian Cyprus club Apoel an lenchilh dawn a, hnehna an chang a nih chuan Tottenham Hotspur hnung zuiin last 16 an lut ang. Group H hmahruaitu Spurs hian point 10 hmuin group stage an paltlang chiang tawh a ni.
Bundesliga club Borussia Dortmund tan knockout stage lut turin an match hnuhnung pahniha chak ringawt a tawk tawh lo a, an chunga awm Real Madrid chetsual an ngaihchan a ngai tawh, zaninah Tottenham an mikhual ang. Peter Bosz-a naute tan Europa League khel phak tur pawhin chak a pawimawh.
Ramos a chiang lo
Spanish champion Real Madrid leh Atletico Madrid ten kawrtawpah Madrid derby an khel a, goal awm loin an inhnehtawk. Atletico lakah hian Real captain Sergio Ramos chu a hnarah hliam sak a ni, khelmual chhungah enkawl a nih hnuin half time-ah thlak a ni. Spain international defender hian a club tan chuan vawi sang tam pawh thisen chhuah a huam thu sawi mah se zaninah erawh a inlan theih a beiseiawm lo.
Zinedine Zidane-a'n a player pawimawh Luka Modric, Dani Carvajal leh Mateo Kovacic te chu hliam vangin tun season-ah a la chhawr tam lo, La Liga bakah Champions League lamah beisei an phak loh chhan pawh a ni thei ang; Real Madrid trio hi an dam kim tawh a, Cyprus-ah chuan inkhel bul an ṭan thei tawh tura ngaih a ni.
Cristiano Ronaldo-a'n league match riatah goal khat chiah la khung mah se Champions League-ah erawh match li aṭangin goal ruk a khung thei a, top scorer a ni mek. Portugal thiampuipa Ronaldo hian ṭum danga Real Madrid chhandamtu a ni tawh angin Apoel lakah pawh mi bik a nihna a lantir a ngai dawn.
Germany-ah Spurs
North London derby-a Arsenal hneh lo hlim Tottenham hian zanina an hmachawn tur Dortmund hi Wembley Stadium-ah an hneh tawh a, tun ṭuma an inkhelhna tur erawh Signal Iduna Park a nih tawh avangin boruak a dang ang. Mauricio Pochettino-a'n a player ṭha ṭhenkhat a chawlhtir a nih pawhin a mak lo ang, chutih rualin group hmahruaitu nih an duh erawh chuan inkhek a la fuh lo.
Mauricio Pochettino-a'n Arsenal lakah a player neih ṭhat a chhawp chhuak a, defender Danny Rose erawh squad-ah telh a ni lo. England international hi thla kua zet a khup hliam vangin a chawl a, a chawlh lai hian an manager chu player langsar lalut lo tiin a sawisel.
Argentine manager Poch chuan, "Rose hi a chawl rei a, ṭha taka khel tur chuan hun a la mamawh a ni," a ti. Kum 27 mi Rose hian Dortmund a hmachawn tura ngaih a ni a, squad-ah a tel lo leh a nih chuan nipui laia a sawi tawh angin a hma hun a chiang lo zui thei ang.
Champions League draw neih a nih tirh khan mi tam tak chuan Tottenham hi group stage paltlang zo lo turah an ngai, amaherawhchu Spurs hian an elpui tura ngaih Real Madrid leh Dortmund te hi an hneh tawh a, match hnih khelh hmabak nei chungin an tlang der tawh; last 16 khelh huna team nem zawk an hmachhawn theih nan pakhatna nih chu an tum ber tur a ni.