Team ka thlak danglam dawn - Pep Guardiola

Manchester City-in Cham­pions League group stage match li an khelh tawhah an la chak vek a, knockout stage an lut tawh. Hei vang hian Pep Guardiola chuan zanin dar 1:15-a Feyenoord an mikhual hunah team a siksawi tur thu a sawi.

Group F inkhel dangah Napoli-in (3 pts) an mual­ah Shakhtar Donetsk (9 pts) an hmachhawn dawn a, Italian club hian group stage paltlang turin chak ngei an mamawh thung.

Guardiola-a'n season khatnaah City nomawi a chawi pui thei lo a, season hnihnaah erawh nomawi chawi turin an dinhmun a ṭha chho hle. Champions League-a an chak vek bakah City hian league match 12 khelh tawhah vawi 11 an chak a, hneh loh an la tawng lo.

City hian Inrinni zan khan Leicester City 2-0 in an hneh a, hemi ṭum hian defender John Stones chu a inhliam. Spanish manager Guardiola chuan, "Vanneihtlak tak­in knockout stage kan lut tawh. Feyenoord kan hmachhawn hunah chuan team ka thlak danglam tawp ang. Lei­ces­ter hmachhawn lo hoin Feyenoord hi an hmachhawn ang a, player khel nawn an awm thei bawk. Inkhel bul ṭan­tur ka la tichiang lo a, amaherawhchu Dani­lo, Yaya Toure, Ilkay Gun­dogan leh Bernardo Silva ten an khel ang tih chu ka chiang," tiin team a thlak danglam tur thu a sawi.

City boss Pep chuan sawi chhun­zawmin, "Knockout stage lut tawh mah ila pakhatna nih kan duh. Chuvangin kan inpuahchahna lam­ah chuan Stamford Bridge kan tlawh dawna kan training dan nen a danglam lo. Tun hnaia kan result a ṭhat avanga ngaih ṭha taka awm ve ngawt ka phal lo, rilru put hmang dik lo chu hrem loin an chhuak lo ang," tiin inelna a lak thu tak thu a sawi.