London lal thar Dimitrov
Grigor Dimitrov chuan David Goffin lakah 7-5, 4-6, 6-3 a hnehna changin ATP World Tour Finals nomawi a chawi a, kum 1998 hnu lamah mipa singles season kharna tournament-a vawi khat inlanna a champion nghal thei hmasa ber a ni.
Pathianni zan khan O2 Arena, London-ah final hi khelh niin Bulgarian tlangval hian tun hma lama a la tawn ngai loh boruak a tawng, match point vawi nga a hmuhna chhawr ṭangkaiin tennis a khelh china a nomawi lian leh hlu ber chu a chawi.
Tun kara world ranking chhuak tharah chuan seeded parukna Dimitrov hi world number 3 a ni dawrh dawn, a chungah hian tennis legend Rafael Nadal leh Roger Federer te chiah an awm tawh dawn tihna a ni.
Kum 26 mi Dimitrov chuan, "Ka tan chuan chawlhkar nuam leh hlu bik a ni, ka hun tawn hi sawifiah vak dan ka hre lo zawk hial. Ka team leh ka chhungten min ṭawiawm ṭha a, tournament khelh phak ringawt pawh a hlut tawh nak a laiin nomawi chawi chu sawi ngaihna a awm lo," tiin a sawi.
Kum 1998 khan Spain tlangval Alex Corretja chuan a thiam pariat ten an khelh ṭhin ATP World Tour Finals-ah hian a vawi khat inlannaah nomawi a chawi thei a, Dimitrov hian a sulhnu a rawn chhui ve leh chiah.
Dimitrov chuan season thar thlir nghalin, "Kum tharah chuan player hliam nei an rawn dam anga, tun ai hian inelna pawh a hautak zawk ngei ang. Ka nihna tak fiahna hun ṭha a inṭan chho dawn a, season ṭanna tur hi hard court a nih avangin beiseina pawh ka nei sang," a ti.
Season kharna tournament-ah hian hliam vangin Novak Djokovic, Andy Murray leh Stan Wawrinka te an khel thei lo a, world number 1 Rafael Nadal chu inlan mah se match khat bak a khel lo, hliam vangin a inhnukdawk a ni. Grand Slam vawi 19 champion tawh Federer-a'n semifinal a thleng a; Swiss star hi Goffin lakah a tlawm avangin player langsar lo zawk tan hun ṭha a inhawn phah a ni.
Champion Dimitrov tan season a tawp nghal a, Goffin tan erawh Davis Cup final khelh tur a la awm. Ram leh ram tennis team hmanga inelna Davis Cup chu tunkar tawp hian Belgium leh France ten an khel dawn a, ATP Finals-a a chak lo zawk Goffin chuan a vawi khat nan an ram Belgium chu champion pui a tum dawn a ni.