Valencia-in Barca an hnaih

Spanish La Liga lam­ah Valencia chuan an result neih ṭhat an chhawm nung zel a, Pathianni zan khan an mikhualna ramah Espanyol chu 2-0 in an hneh - Valencia hian league match riat chhung chu a zawnin chak hmel an hmu tawh a, an club chanchinah heti zata rei hi a zawnin an la chak ngai lo.

Valencia hian hnehna chang mah se first half-a hun nei ṭha zawk erawh Espanyol an ni a, Gerard Moreno leh Sergi Darder te chuan mualneitu team tana hmahruaina goal khungna hun remchang an neihah goal ban an pet per.

Chawlhlawk hman a nih hnuah match 12 an khelh tawha tlawm hmel la hmu lo Los Che (Valencia sawina) an khel ṭha sawt a, coach Marcelino hnawhchhuah a nih hnuah Geoffrey Kondogbia chuan yard 25 vela hla aṭangin goal hmahruai a khung.

Santi Mina a inlar chhunzawm a, minute 83-naah chak nemnghehna goal a khung. Valencia-in La Liga table-ah pahnihna dinhmun an luah mek a, Pathianni zanah point lia an phak loh mek hma­hruaitu Barcelona nen an inkhel dawn.