Jeje-te tlawm zanah Jerry a langsar
India rama football inelna ngaihhlut hlawh ber Indian Super League-ah Mizo hming a langsar zel - Pathianni zan inkhelah Chennaiyin FC-in 3-2 in FC Goa ngam lo mah se Jerry Lalrinzuala erawh kut ruakin a haw lo a, Bethlehem Veng tlangval hian Emerging Player of the Match chawimawina a dawng.
I League aṭanga ISL lama insawn Bengaluru FC-in ISL-a an match hmasa berah hnehna an chang nghal a, an mikhual Mumbai City chu 2-0 in an lo hneh. Bangalore club goal hnih khung hi Eduardo Martin leh Sunil Chhetri khung a ni a, kut ruakin Mumbai City an haw.
Chennaiyin an tlawm
Chennai club tan Mizo tlangval pahnih Jeje Lalpekhlua leh Jerry Lalrinzuala ten inkhel bul an ṭan a, FC Goa lamin Mizo an nei lo. Jawaharlal Nehru Stadium, Chennai-a inkhelah rin loh takin mikhual team lamin inkhel an thunun a, goal hmasa ber khung turin an nghah rei a ngai lo. Espanyol striker hlui Ferran Corominas chuan minute 25-na lekah goal hmahruai a khung.
Goan club an phur laklawh a, goal hmahruai an khung aṭanga minute li hnu lawkah season hmasaa Real Zaragoza tana khel Manuel Lanzarote chuan an goal hnihna a khung. Chennai an insiamṭha hman meuh lo, Mandar Rao Dessai a inlar ve leh a, Goan tlangval hian an khaw team tan minute 38-naah an goal thumna a belhchhah.
Chennaiyin an huaisen
Chawlhlawk hman a nih meuh chuan Goa-in goal thum an khung tawh a, mualneitu Chennaiyin-in goal khung an nei lo thung. Mahse, Chennai club hian chawlhlawk laiin thu ṭha an ngaithla tih an lantir a, second half-ah an khel a nung sawt. Mizo tlangval Jeje-a'n hun ṭha a nei nghal a, substitute Gregory Nelson chuan post a pet per zui bawk.
Chennai club-in minute 70-naah goal an khung ve ta nge nge a, Spanish defender Inigo Calderon chuan freekick aṭangin an si phurh a sut ṭhen. Minute 84-na a ni a, Jeje bawk a inlar nawn. Mizo tlangval hi penalty area-ah Goa keeper Laxmikant Kattimani chuan a ti tlu a, penalty a hlawh chhuak - Raphael Augusto-a'n goal a chantir turin harsatna a tawk lo. Mahse, Chennai club harhchhuah a tlai a, an si phurh an sut zo hman lo.
Steelmen an tlangnel
Bengaluru FC-in ISL-a an match hmasa berah zam hmel an pu lo a, an mikhual Mumbai City chu 2-0 in an lo hneh. Sree Kanteerava Stadium, Bengaluru-a inkhelah hamrik a rik rualin Bangalore club-in mualneitu an ni tih an pholang a, captain Sunil Chhetri, Udanta Singh, Lenny Rodrigues leh Venezuelan striker Miku ten hun ṭha an nei vek a, goal-ah an chantir thei lo vek thung.
Minute 66 a thlen meuh erawh chuan Bengaluru an hlawhchham reng tawh bik lo. Spanish midfielder Eduardo Garcia chuan goal hmahruai a khung a, Indian goalkeeper hlawh hnem ber ni tura Bengaluru aṭanga Mumbai pantu Amrinder Singh-a'n tih theih a nei lo. Hun pek belhah Mumbai goalkeeper Amrinder a chesual zui a, defender Mehrajuddin Wadoo nena an inringthul karah Sunil Chhetri chuan an goal hnihna a khung.
Khawiah nge Mizo?
Bengaluru FC-ah Mizo an awm nual a, Spanish coach Albert Roca enkawlna hnuaiah Mizo player-ten hmun an chang phak meuh lo. Bangalore club hian draft-ah manto takin goalkeeper Lalthuammawia Ralte an lei a, mah se Champhai keeper hi ISL ṭan dawnah a inhliam avangin draft zawh hnua an lei Gurpreet Singh Sandhu-a'n si ban a nghak.
Chaltlang rawlthar Mal-sawmzuala chu bench-ah
ṭhuttir ni mah se tlan luhtir a ni lo a, nuai 25 senga an lakluh Zohmingliana Ralte tan hmun a la awm lo bawk. Ramhlun South tlangval hian Aizawl FC-in I League nomawi an chawina kawngah minute zawng zawng khel kim mah se Albert Roca hnuaiah hmun a chang lo. Mumbai City lamah Lalchhawnkima a awm bawk a, Aizawl FC defender hlui hian bench lamah a hun a hmang ve bawk.
Chennaiyn FC 2 - 3 FC Goa
Moment of the Match Mandar Rao Dessai, FC Goa
Winning Pass of the Match Brandon Fernandes, FC Goa
Emerging Player Jerry Lalrinzuala, Chennaiyin FC
Hero of the Match Manuel Lanzarote, FC Goa
Bengaluru FC 2 - 0 Mumbai City FC
Moment of the Match Lucian Goian, Mumbai City FC
Winning Pass of the Match Udanta Singh, Bengaluru FC
Emerging Player Abinash Ruidas, Mumbai City FC
Hero of the Match Sunil Chhetri, Bengaluru FC