Juventus tlansantu Inter Milan

Pathiani zan Italian Serie A inkhelah champion lai Juventus chu Sampdoria lakah 3-2 in an tlawm a, inkhel dangah Inter Milan chuan Mauro Icardi goal hnih hmangin Atalanta 2-0 in an hneh thung. Luciano Spalletti naute hian point 33 hmuin Juventus chu point hnihin an tlanpel.

Juve an tlawm

Massimiliano Allegri-a'n Italy tana inkhelh an chawlhsan thu puangtu goalkeeper Gianluigi Buffon leh defender Andrea Barzagli te bench-ah a ṭhuttir a, Italian manager hian ram tana feh chhuak player pawimawh pahnih hi hahchawlhna hun a pe a ngaih a ni.

Mualneitu Sampdoria hian Duvan Zapata, Lucas Torreira leh Gianmarco Ferrari te goal hmangin 3-0 in hma an hruai a, khualmualah Juventus an mualpho chiang hle dawn niin a lang. Turin club tan hian injury time-ah Gonzalo Higuain leh substitute Paulo Dybala te chuan an mualpho lutuk tur thih ziaawm nan goal an khung.

Turin club hian a zawnin league match ruk chhung hnehna an chang thei a, Sampdoria lakah erawh Mario Mandzukic leh Juan Cuadrado ten Higuain-a siamsak ṭha tak an khung thei lo a, inkhel ṭantirh lama an hun ṭha neih an hloh hnem avangin an nomawi humhim tur chuan an hna a hautak sawt dawn.

Inter tan Icardi

Luciano Spalletti-a'n Juventus chiah hi champion tura rinkai an nih bik loh thu a sawi tawh a, AS Roma manager hlui hian Inter chuan nomawi chawi an tumzia lantir nan hmalam a pan pui zel. San Siro-a inkhelah Inter tan captain Icardi chuan second half-ah goal hnih a khung, Argentine striker hian tun season kal laiah league bikah goal 13 a khung tling der tawh.