Tennis star Jana Novotna a thi

Tennis inelna zinga ngaihhlut ber pakhat Wim­bledon champion hlui Jana Novotna chu nimin khan can­cer vangin a thi, Czech Republic nula hi kum 49 mi a ni.

Hmeichhe tennis thuneitu sang Women's Tennis Association chuan, "Novotna chu thlamuang takin a chawl ta," tiin a thih thu an sawi; WTA chief executive Steve Simon pawhin Jana chu court chhungah leh pawnah pawh player dangte tana entawn tlak leh chona ṭha siamsaktu a nih ṭhin thu a sawi.

Steve Simon chuan, "WTA chuan Jana hi kan theihnghilh tawh dawn lo, a sulhnu ṭha tak hi kan thinlungah a cham reng tawh dawn a ni. A chhungte kan tawrhpuiin thlamuanna an neih ngei kan duh," an ti. Novotna hi a vanglai chuan a service ṭha leh volley ṭha chu a larna a ni a, world ranking-ah a tawn san lai berin number 2 a ni.

Czech star hian kum 1993 leh 1997 kham Wimbledon final khelin pahnihna a ni a, final vawi thum a khelhna 1998-ah erawh France star Nathalie Tauziat hnehin nomawi a chawi.

Novotna-i'n Wimbledon nomawi a chawi khan kum 29 leh thla kuaa upa a ni a, khatih hunlai khan Open Era bika Grand Slam nomawi chawi thei upa ber a ni.