Sevilla khelmualah Liverpool tan hun ṭha

Zanin dar 1:15-ah Sevilla chuan Liverpool an mikhual dawn a, Reds tan zanin hi hun ṭha a ni. Jurgen Klopp-a naute hian an mikhualna ramah hnehna an chang thei a nih chuan Group E hmahruaitu nichungin match khat khelh tur la awmah last 16 an lut chiang ang.

Point riat hmua hmahruaitu ni mek Reds hian draw result chauh hlawh chhuak pawh ni se last 16 luh theihna dan an la nei tho - zan dar 10:30-a Spartak Moscow leh Maribor inkhelah Russian club Spartak hi an tlawm chuan last 16 an lut tho dawn.

The Mo Salah Period

Tun season-ah Liverpool tana khel ṭha ber chu Mohamed Salah a ni a, Egyptian winger hian Liverpool tan match 18-ah goal 14 khung tawhin assist vawi li a nei. Reds-in 2013/14 season-a pa­hnihna dinhmun an hauh

ṭum khan Luis Suarez leh Daniel Sturridge chu Premier League-ah goal khung hnem top three-ah an lang a, hemi hnu hian Reds-in season khata goal 15 khung thei an nei leh tawh lo.

Salah-a'n goal 15 khung tling turin goal khat bak a ma­mawh tawh lo a, Sevilla lakah hlawhtlintir a tum ang. Liverpool boss Jurgen Klopp chuan tuna Reds dinhmun chu 'the Mo Salah period' tiin thiam takin a sawi a, Premier League-a Harry Kane, Sergio Aguero leh Romelu Lukaku te aia goal khung hnem zawk dinhmun luah mektu lakah hian beiseina sang tak a neih chhunzawm ang.

Sakei buzawl?

Sevilla-in an khelmual an hmang thiam a, Liverpool tan len­luh châkawm tak a ni lo. Spanish club hian Sanchez Pijuan-ah tun season-ah match kua khel tawhin tlawm hmel an la hmu miah lo a, heng zinga an match hnuhnung pasarihah hian an mikhual an hneh vek - Liverpool lakah an khelmual hmanthiam an theihnghilh thut lo ang.

Liverpool-in match li chhung a zawnin chak hmel an hmu tawh a, goal 13 ngawt an khung - kum 1980 khan Bob Paisley kaihhruaina hnuaiah Reds hian goal thum emaw a aia tam khung chungin match li chhung chu a zawnin chak hmel an lo hmu tawh a, Sevilla lakah Reds hian goal thum an khung thei a nih chuan kum 37 hnuah record thar an siam dawn tihna a ni. Hna awlsam tak erawh a ni dawn lo.

Khaikhinna

Liverpool-in Anfield-ah Sevilla an mikhual tawh a, Cham­pions League-a team pa­hnih intawn hmasakah hian English club hi chak tura beisei ni mah se beisei ang result erawh an hlawh chhuak lo - 2-2 in an ṭin. Reds tan Roberto Firmino leh Salah ten goal khat ve ve an khung a, Ben Yedder leh Joaquin Correa ten Spanish club tan an khung ve bawk.

Europa League 2016 final-ah khan team pahnih hi an lo intawng tawh bawk a, Jurgen Klopp-a'n Reds-a a season hmasa berah nomawi hmasa ber chawi tum viau mah se 3-1 in an tlawm. Liverpool-in an tawnhriat neih tawh aṭanga insiamṭhat an tum a nih chuan zanin hi insiamṭhat hun a ni a, zanin hi phuba lak hun chu a ni.