MPL Under 18-ah BVT leh Dinthar ten semifinal lut
Mizoram Premier League Under 18 league round chu nimin khan khelh zawh a ni a, nizana inkhel Aizawl FC leh Mizoram Police te result kan hre hman lo.
Nimin inkhelah Bethlehem Vengthlang FC leh Dinthar FC ten an khingpui Chanmari FC leh Ramhlun North te hnehin semifinal an lut a, Chhinga Veng erawhin Chanmari West hneh mah se AFC leh Police inkhel result-ah an hmalam hun a awm.
BVT an ṭha
Chanmari FC-in champion tumin MPL Under 18 hmachhawn mah se Bethlehem Vengthlang an ngam loh avangin knockout stage an thleng pha lo. BVT tan Lalruatkima'n goal hnih a khung bakah Joel Lalmuanpuia leh K. Lalrosanga ten goal an khung a, Chanmari tana Lalnunzama goal hnih khungin result a ti danglam pha lo.
Champion lai BVT hian match sarih khelhah vawi nga chakin vawi hnih an inhnehtawk a, chak loh an nei lo a, nomawi chawi tura rinkai an ni.
MPL aṭangin Dinthar FC an relegate a, season tharah MPL an khel dawn lo. Maimawms hian nimin khan Ramhlun North 2-1 in an hneh a, Dinthar tan hian Vanlalmuanpuia leh Lalthlamuana ten goal an khung a, semifinal an lut.
Chhinga Veng hmalam
Chhinga Veng senior team-in harsatna nei loin semifinal an lut a, Under 18 team tan erawh a awlsam lo. Chhingcows hian nimin tlai khan Chanmari West 8-0 in an sawp. Chhinga Veng tan C. Beithatlo-a'n hattrick a siam a, S. Beirahropha-a'n goal hnih a khung bakah Lalhmingmuanpuia, Allan Lallawmsiama leh Lalremruata ten goal khat ṭheuh an khung.
Chhingcows hian goal riat khungin point 12 hmuin palina dinhmun hauh mah se pathumnaa awm Mizoram Police (12 pts) aia head to head an chhiat zawk avangin tla thei an ni. Nizan inkhela Aizawl FC-in Police an hneh chuan Chhinga Veng hi an tla ang.
Inkhel Results
Bethlehem VT 4 - 2 Chanmari FC
BVT : Joel Lalmuanpuia 17'; Lalruatkima 45', 57'; K. Lalrosanga 53'
CFC : Lalnunzama 34', 79'
Ramhlun North 1 - 2 Dinthar FC
RNFC : Lalruatdika 64'
DFC : Vanlalmuanpuia 31'; Lalthlamuana 33'
Chanmari West 0 - 8 Chhinga Veng
CVFC : S. Beirahropha 1', 23'; C. Beithatlo 9', 15', 53'; Lalhmingmuanpuia 34'; Allan Lallawmsiama 76'; Lalremruata 81'
Team Dinhmun
# Team Pld W D L GF GA GD Pts
1 Bethlehem Vengthlang 7 5 2 0 19 9 10 17
2 Dinthar FC 7 4 1 2 12 15 -3 13
3 Mizoram Police FC 6 4 0 2 16 9 7 12
4 Chhinga Veng FC 7 4 0 3 22 7 15 12
5 Aizawl FC 6 3 1 2 14 6 8 10
6 Chanmari FC 7 3 0 4 13 12 1 9
7 Ramhlun North FC 7 1 0 6 10 23 -13 3
8 Chanmari West FC 7 1 0 6 7 32 -25 3