Champions League Chelsea leh Roma dinhmun a ṭha, Atleti engtin nge?

Zaninah Champions League inkhel hmuhnawm a awm dawn a, group ngaihnawm group C-ah AS Roma, Chelsea leh Atletico Madrid te an inlan vek dawn.

Roma leh Chelsea ten hnehna an chang a nih chuan last 16 an lut chiang ang a, Atle­tico tan last 16 luh beiseina nei turin chak ngei ngei a ṭul bawk.

Zanin dar 10:30-ah Chelsea chuan Qarabag an lenchilh dawn a, Stamford Bridge-a 6-0 ngawta an lo sawp tawh team lakah hian hnehna chang tura beisei an ni.

Zing lam dar 1:15-ah Atletico Madrid-in AS Roma an mikhual dawn bawk a, he inkhel hi mipui nghahhlelh chu a ni.

Inkhel pawimawh
Chelsea-in Champions League-a AS Roma an hneh loh hnuah Manchester United leh West Brom a zawnin an hneh a, kar hmasa Premier League-a Baggies an hneh zawhah Blues manager Antonio Conte chuan, "Inrintawkna nei turin heti zata hnehna chan hi a pawimawh a ni," a ti a, he inkhelah hian N’Golo Kante, Cesc Fabregas leh Eden Hazard te chu la chhuakin Qarabag nena an inkhel tur a thlirlawk.

Conte chuan, "Kan tan chuan tun season-a inkhel pawi­­­mawh ber a ni dawn. Hneh­na kan chang a nih chuan last 16 kan lut dawn a ni," tiin an hun ṭha neih bawhpelh a thian loh thu a sawi a, Baggies laka goal hnih khungtu Hazard leh Alvaro Morata-te an hna thawk tura beisei an ni ang.

Chelsea zinkawng
Blues-in Champions Lea­gue-a an match hmasa pahnih­ah Qarabag leh Atletico Madrid hneh mah se Roma lakah a zawnin chak hmel an hmu lo a, last 16-a an dinhmun tichiang turin zaninah hnehna an chan ngei a ṭul phah.

London club hian draw result ringawt pawhin last 16 an lut thei dawn tho - mah se hemi tur chuan Atletico Madrid-in Roma an ngam loh a ṭul ang. Chutihrualin group leader nichunga last 16 luh erawh a harsa dawn tihna a ni a, knockout round-a team ṭha pumpelh nan hmabak match hniha hnehna chan hi Chelsea tan a pawimawh.

Atleti engtin?
Champions League-a team langsar ni ṭhin Atletico Madrid-in tun season-ah beisei an phak lo a, group stage aṭanga tla thei dinhmunah an ding mek - match li an khelh tawhah vawi thum an khingpui an inhnehtawkpui a, Chelsea an ngam lo bawk. Zaninah an mikhual AS Roma an ngam lo a nih chuan petchhuah an ni ang.

Roma-in match li an khelh tawhah tlawm hmel an la hmu miah lo thung a, Atletico nen hian an inhnehtawk a nih pawhin last 16 an lut ang - hei mai hi a ni lo, Roma hian group match hnuhnung berah Qarabag an la mikhual dawn avangin zaninah pressure nei loin an khel thei dawn.

Attacking football?
Rojiblancos (Atletico sawi­na) -in hnehna chan ngei an mamawh miau avangin attacking football an khelh ngei a ngai dawn a, an buaina erawh an tlarhma ten tun season-ah beisei an phak lo lutuk hi a ni. An innghahna ber ṭhin Antoine Griezmann-a'n match 14-ah goal thum chiah a la khung a, Kevin Gameiro leh Fernando Torres ten eng ruai an ang bik lo.

Mahse, nipui transfer laia Manchester United nen sawi zawm an nih hnua Atletico lama cham thlang Griezmann chuan, "He hmuna ka cham hi ka inchhir lo. Match sarih chhung goal ka khung tawh lo a ni mai thei a, mah se ka khung leh dawn tho tihah hian ka chiang em em a ni," tiin a hlauh­thawn loh thu a sawi a, Roma lakah goal khung a tum ang.