Champion lai Tuikual hmaah Siaha
3rd Hrangbana Memorial Mizoram Badminton League-ah champion lai Tuikual Shuttlers-in zanin dar 8:00 hian Electric Veng Hall-ah group B hmahruaitu Southern Acers Siaha an hmachhawn dawn. Nizan khan Zotlang Rockets leh Mission Veng ten semifinal hmasa zawk an khel a, result kan hre hman lo.
Zanin inkhelh dan tur sequence MS-1, XD, MS-2, U19 BS & MD a ni a, chak tur rin thiam a har hle.
Southern Acers-in an match hnuhnung berah Mission Veng 3-2 in an hneh a, harsatna nei loin chak mah se Tuikual Shuttlers lakah chuan a awlsam lo ang.
Men's Singles 1 aṭangin inelna ṭan tur a ni a, Tuikual state pawn player Subham Prajapati-a'n Lalhlimpuia lakah hnehna a chang tura ngaih a ni. Mixed doubles-ah Siaha dinhmun a
ṭha zawka ngaih a ni a, Akshit Mahajan leh Lalvenhimi te an inkawp fuh a, Tuikual aiawhin Zothanzami'n tu pawh rawn kawp se an chak zawh a rinawm loh.
Men's Singles 2 hi chak zawk zawnna tura ngaih a ni thei ang. Tuikual player pawimawh Samuel Lalnunmawia'n Zotlang state pawn player Kiran B a hneh lo a, umpire thutlukna vanga ngaih theihna chin a awm. Zanin hian Samuel hian Akshit Mahajan a hmachhawn dawn a, chhuanlam neih a thiang tawh lo ang.
Under 19-ah Siaha aiawh tur Lalnunhlua hi Mizoram junior number 2 a ni a, group stage-a a khelh dan thlirin Tuikual aiawh tur junior number 4 Lalmuanawma Sailo tan hneh tur chuan chet fuh ve a ṭul ang. Men's doubles-ah Tuikual tan Samuel leh Subham Prajapati te an inkawp chuan Siaha lam tan heng player pahnih hneh zo tur thawhchhuah a har ang.
Team pahnih player neih dan thlirin match thumna hi tualchhung badminton ngainatute tan chuan hmaih a thiang lo. Samuel leh Kiran B te inkhel a hmuhnawm tawh a, zanin hi final khel tur zawnna a nih avangin Samuel leh Akshit te inkhel hi a hmuhnawm khawp ang.