Zlatan hlawkpui tur Romelu Lukaku

Manchester United striker hlui Andy Cole chuan Zlatan Ibrahimovic leh Romelu Lukaku te inkawp tur chu phurawm a tih thu a sawi a, Swede striker thiamna chu Belgian striker hian a hlawkpui a beisei thu a sawi bawk.

United tana goal 121 khung tawhtu striker Cole chuan, "Ka phur khawp mai. Lukaku dinhmun angah hian ka ding tawh a, hetia striker ṭha an rawn luh hian kan ṭhatna phochhuahin a awm ṭhin. Zlatan hian Lukaku ṭhatna hi a phawkchhuah ka ring tlat a ni," a ti.

Jose Mourinho kaihhruai United hian Champions League-ah knockout stage an lut tawh a, zanin dar 1:15 hian Basel khelmual an tlawh ang. Group A inkhel dangah CSKA Moscow leh Benfica te zanin 10:30 hian an inkhel bawk ang.